| |
|
|
|
|
||
《壹線傳真》
王智豪*
(一)A (演區分右、中、左三部分。
右演區面積最大，在舞台上。中央放有一張長型工作檯，檯上有一部PC，若干File，另有報紙、雜誌、紙張及其他物件。
這個工作間還有一張兩人沙發、File櫃、廢紙箱、雪櫃、飲水機、幾大疊報紙。
牆上，有兩塊Board，一塊是水松板，上面釘着不少Memo；另一塊則為White Board。另外還貼着一張大的告示，上書“壹線傳眞守則”幾個字。此外，側便還有電視和錄影機。
中間部分為一個小型的錄影廠，背面正中部分有佈景板，前面有一張椅，旁有小几，上有假花一盆。另外，還有一張同一款式的椅子放在一角。
左演區又可細分爲高低兩部分，有梯級互通，左下演區的一角，放有單座沙發及圓型‘‘咕臣”各一個。)
(燈亮)
(Isabel拿着一個大袋，一手拿着一包零食，匆匆地走進。)
I：(望較高處)好彩!一二五八，仲差兩分鐘!(望觀衆)其實呢，衹要一點三之前返到嚟就得
嘞!點解？要睇澳廣視嘅午間新聞囉!仲要錄低
，但係老細唔準我哋淨係睇帶!嘻，若果准嘅話，個個必然遲到喇!
(走到告示前，指指那些“守則”)
守則其中一條：“比你的上司起碼早十五分鐘回來。”
我係新丁，當然最早返喇!老細呀，有兩點都未現身喇!(輕聲)
晚晚劈酒劈到兩三點!
I：呀!都唔記得介紹自己，我叫做Isabel，姓夏。以前有人叫我做“二十包”嘅，呢度D同事就叫我做“二十吓”，因為佢哋話我成日“十吓十吓”喎!佢哋成日話，而家D“靚妹靚仔”多數都係“十吓十吓”嗰喎!咁……我又確實成日擺烏龍，渾渾噩噩咁嘅。
唔緊要喇，吸收吓經驗啫，啱啱出嚟做嘢係咁喇!(一邊吃零食，坐下)
我喺Santa Rosa Form Five畢業嘅，稔住……搵幾年錢先，然後再去讀書囉。我又唔想做D咁死板嘅工喎，咪搵人介紹，入咗嚟“壹線電視台”，maccable TV度做囉。
(Isabe1站起來，繞着工作檯而行)
I：“壹線電視台”其實就係Cable TV。
“壹線”，即係最前線，又即係“壹線牽”咁解，因為我哋係用一條Cable，將資訊源源不絕咁送到用戶嗰度。我哋所製作嘅《壹線傳眞》，係一個“新聞檔案”式嘅節目，一個星期播一次。
呢，我哋唔係返朝九晚五，而係由一點返到晚黑七、八點，我哋呢個節目，主要係要由各張報紙、電台、電視台嘅新聞裡便，挑選一D，再發掘佢背後唔尋常嘅地方。可以咁講：《壹線傳眞》係一個“非常”嘅新聞性節目嚟嘅。
(一)B (一名三十歲左右的男子入)
I：(望望此男子)呢，我就係跟佢嘞，唐景輝呀。我叫就叫做“見習記者”，但係同資料搜集冇分別，甚至等於打雜。
(向輝)早晨輝哥。
唐早晨。
I：(向觀衆)我哋係叫“早晨”!(指手錶)
(向唐)有冇乜嘢Good Story呀？
唐：我淨係睇咗“澳日”咋，冇乜好古仔啫，咪係D立法會選舉嘅新聞囉。仲有D候選人猛喺度做勢囉。
I：呢輪淨係得呢D Story，悶親!好滯呀!
唐：太濫啦!D應景新聞浪費咗觀衆嘅時間，有計喇!個個都一窩蜂。點呀？妳點睇呀？有有料到呀？
I：有呀……Blue Balloon快餐店開三間算唔算新聞呀？
唐：車!
I：哈哈……
唐：認眞D呀!因住比Danny照肺呀。
I：唔係喎!一個星期開一間，唔夠一個月已經第三間嘞。
唐：佢哋係計劃開三間
，不過分開嚟做，延續個勢啫。
I：但係係咪勁過大快活同大家樂先？
唐：咁就係。呢家快餐集團又係幾犀利嘅，老細有米，而且請到個“至叻星”同佢打理喎，似乎志在必得咁。
I：邊個“至叻星”呀!
唐：一個姓張嘅叻女。聽講佢喺美國嘅餐廳集團mels度做過，跟住再喺香港Caf'e Cobblestone做咗好多年，佢原本係本地人嚟，妳師姐嚟。
I：(喜出望外)係咩？唔!要搵機會識吓佢至得嘞!(隔一會，覺有點奇怪)
輝哥，點解你知咁多嘢嘅？跟過呢個Case呀？
唐：啊……啊!有!唔……係呃。
(大門走進一位漂亮的女孩子)
B：早晨呀!
唐：早晨!
I：早晨Bridget。
唐：Bridget!(遞上一個牛皮信封)
B：吓？眞係搵到D資料呀？(接過信封)
唐：嗯。
B：好嘢喎!輝哥，唔該晒。
唐：小意思啫。
(兩人並排坐下，Bridget拿出信封內的文件來看，二人互相研究。)
I：(向觀衆)唐景輝成日都向Bridget獻殷勤啦!佢有冇企圖我就唔敢講，不過……(望望二人)Bridget係一個好好嘅女仔，讀英文傳意嘅，但係中文都幾好，勤力，肯學，我稔D男仔會鍾意呢D女仔。
(又一個漢子入，他望了望Bridget與唐，窒了窒)
門：早晨。(往斟水)
衆：早晨。
I：溫門呀。我哋都叫佢做Walkman，因為用普通話講佢個名，個音有D似Walkman吖嘛。佢同我一樣，乜都要做。佢以前喺過西安電影製片廠做過，而家，除咗做資料搜集之外，仲要做司機，有時要客串做Cam－man，搵笨嘅!
I：Walkman，咁猛太陽仲去抹車呀？
門：係呀，冇辦法喇。
門：呀，一點三喇!仲唔開機？
I：係喎!(往開電視及錄影機，然後向觀衆)每日到咗呢個時候，我哋就會睇TDm嘅午間新聞，不過近期好多乜會物會搞活動，D領導人就爭取出鏡、見報同發表言論喎，可以揀出嚟嘅新聞唔多。
唐：近期呢D新聞太多啦，呢D題材最大嘅價値可能衹係在於能夠充塞到廣播時間或者係報紙嘅版面。
B：但係……九九年之前最後一屆立法會選舉喎，唔算係大事咩？
唐：算!不過，太着重呢D古仔，會令到好多人麻木，甚至覺得無聊。近期唔係冇其他値得市民關注嘅事喎，多花D心思，採用第二D更加有資訊價値嘅消息，取代呢D“行貨式”新聞仲好喇。
B：但係，多D呢D消息，上到市民嘅議事日程唔好咩？反正一般市民公民意識咁薄弱，等佢哋多D資料，可以做D分析同比較吖嘛。
唐：太多資訊，市民會被動，唔去自己思索，反而無形中接受咗指引囉。
門：傳播其中一項功能就係敎導吖嘛。
唐：Walkman，咁我哋就要睇吓，落到市民度嘅嗰D消息，係傳媒整理好嘅，定係D候選人藉住傳媒自己掟出去嘞。係咪呀？二十吓？
I：吓？我……唔知呀，我覺得你哋……兩便都好有道理吖。
唐：Comeon!學吓稔嘢!學吓分析問題，OK？
I：學緊喇。
唐：我哋唔應該間接PromoD候選人啫，佢哋知名度一路一路高，唔代表佢哋嘅能力愈嚟愈強嗰喎。
B：但係……向市民灌輸多D選舉消息，佢哋可以知多D，D資訊或者可以刺激多D人去投票。嗱，每次都會有人安排D阿公阿婆、師奶阿嬸去投票啦，計票數會贏晒，不過，明眼人一睇就知道當選嘅未必就係大多數市民所支持喇!
門：係呢，如果D人乜都唔識，梗唔去投票喇!多D明理嘅有識之士去投票，對各方面都有利吖，所以我哋應該加強——
(望見唐冷住了臉，便收口)
(隔了一會)
唐：咩啫？我稔你都未體會過民主氣氛呀。
門：二十吓!今日台灣D立委有有打交呀？
I：aa!喂喂喂!你哋唔係又想搞兩岸大戰呀？
B：咪囉!搞一中一台呀？記住呀!中國人不打中國人呀!
I：(向觀衆)佢哋係咁啦!一個喺台灣讀新聞系返嚟，一個係西安嚟嘅，點會唔一中一台吖？不過，佢哋Viwa完好快又冇事嘞。
唐：我哋係Gate－Keeper，一定好小心處理D新聞嘅。
B：我覺得我哋處理新聞嘅自由度……都未夠大。
門：都好過上面D傳媒吖!
唐：車!上面電視台D記者夠神勇呀，打晒燈跟住D公安一齊衝入賊竇拉人!
衆：哈哈……
B：呢，報紙起碼有兩樣嘢係眞。
I：邊兩樣呀!
B：第一，日期；第二，天氣消息。
門：錯!
B：錯？
門：我當年喺西安，有一個規定，就係如果天氣熱到超過三十九攝氏度呢，就唔駛上班嘞。不過，無論熱到點厲害法，天氣報告永遠最多衹係三十九攝氏度啫。
衆：啊？
門：你哋話咯，天氣報告可唔可信吖？
(二)a (一穿西裝的中年漢子入)
衆：早晨Danny!
(NI的音唸去聲)
旦：早晨。
唐：咁早嘅？Danny……今日。
旦：今日TDm同報紙有乜嘢特別呀？
B：冇呀……又係選舉囉。
旦：今日嘅報紙呢？如果有嘅，稔番尋日個古仔囉，唔通傾計可以幫到做嘢嘅咩？
(衆人靜止)
B：嗯……尋日我哋討論過，一個叫做“新口岸商戶聯誼會”嘅團體，分別去咗澳督府、治安警察廳、司法警察司同保安政務司度遞請願信，要求搞好治安，嚴拿罪犯。
旦：(想了一想)OK，我哋再研究一下請願信嘅大致內容。Isabel。
I：吓？
旦：吓!？
I：你……叫我Isabel呀？(露出悅色)
唐：係咪一定要叫二十吓至得呀？
I：(連忙)唔係唔係!Isabel!Isabel!
旦：喂，請願信呀!讀出嚟吖!
I：啊!(在檯上找出一個File翻閱)
旦：讀阿輝總結咗之後嗰個歸納版本得啦。
I：啊。(看了一看各人)
1)治安日差，搶劫打鬥案無日無之，市民人心惶惶，出入提心吊
膽，少咗出街，商舖生意大受影響。
唐：其實警察總部已經喺新口岸區嘞，D居民似乎依然有安全感。
I：(望望Danny)繼續吓。
2)警方破案率偏低，好多轟動一時嘅大案都不了了之，令市民信心大失，懷疑警方有否保護市民嘅能力。
(望望各人，見沒動靜，便續讀)
3)警隊士氣低落，時有警員投訴福利、待遇同制度，因此，被匪徒睇準弱點。
I：4)警方一向縱容黑社會，好似衹要佢哋唔搞事就由得佢哋咁。
B：其實邊D人係黑底嘅，大家都知得一淸二楚。
旦：仲有呢？
I：5)警方效率低，應變能力唔夠，而且辦事嘅透明度亦不足。
(Danny在沉思)
旦：(向輝)有比較過各張報紙嘅報導囉呵!
唐：(點頭)有三張報紙嘅社論表示同意呢次請願行動，仲督促保安司一定要正視問題。
(Danny找出一張傳單來看)
旦：呢個聯會嘅請願內容，同……嗰個源仲標喺一個公開場合裡便發表過嘅言論好相似。
(頓了一頓)個商戶聯會嘅阿Head係邊個？係咪佢？
唐：唔係，不過，喺TDm條片度被我發現到佢，佢有去跟埋遞信，不過似乎比較低調。
旦：啊!
B：有份報紙，都影到佢呃。
唐：尋日我搵過佢呃。
旦：係咩？
唐：唔!比段片你哋睇吓。
(二)B (唐景輝去換了一餅帶，按動錄影機，該區燈暗，大螢幕出現了一段訪問片斷)
唐：源生，尋日嘅請願行動，你都有去呵？
源：幫吓手喇!我嘅地產公司都係喺新口岸區嘛，D街坊呢D正確嘅表達意見嘅行動，我一定支持嘅。
唐：請問源生喺呢個聯會之中擔當乜嘢職位呢？
源：啊，有，小意思啫。
唐：請問小意思嘅意思係……
源：嗯……係監事會嘅成員，但係唔係監事長呀，衹係D好小嘅小職位啫。我平日咁忙，主要都係顧住D生意啫，所以唔可以花咁多時間做個會嘅嘢。
唐：啊，我明嘅，源先生咁大生意(頓了一頓)
不過……源生覺得新口岸嘅治安特別差咩？會唔會係全澳嘅罪案黑點呢？
源：嗯……，咁……又未至於。
唐：即係話，你都認為有其他地區嘅罪案率比新口岸區高喇？
源：對不住，我……冇做過正式統計。
唐：如果黑沙灣區、馬場區、台山區、筷子基嘅商戶，都各自進行類似嘅遞請願信行動，你都唔會覺得奇怪？
源：啊……唔會!之不過，成個澳門治安都咁差啦。
(靜止片刻)嗱，你哋做新聞嘅都知喇，新口岸有個警察總部喎，但係並冇對匪徒有阻嚇作用噃。幾個賭場，幾間酒店，你話嘞，邊間酒店冇發生過兇殺案吖？間間都冚過友呀!仲有爆炸案呀!
唐：你嘅意思係，係環境因素令治安變壞喇？
源：仲有就係，警隊質素太差!
唐：何以見得呢？
源：有眼睇喇!有幾何見到佢哋破大案吖？查案嘅時候，司警打死自己人，一係就司警同治安警互相開槍，再唔係就濫用自衛，立亂借槍比人玩，搞出人命，你哋稔吓吖，邊有D驚察咁攪笑？
唐：你覺得呢D問題應該點解決呢？
源：兩方面，第一係大力整頓各警隊部門；第二係提高保安學員嘅取錄條件。
(頓一頓)九九就嚟到，家吓衹會有更多三山五獄嘅人喺澳門搵食嘅啫，再唔致力搞好呢方面嘅問題，將來更弊呀。
(二)C (唐景輝按停錄影機，區燈重亮)
唐：我都覺得源仲標係有意自己做新聞嘅，所以我特登搵佢做一次訪問，等佢自己不打自招，因為其他傳媒對呢次請願普遍都表示出正面嘅態度，佢執住呢一點嚟“Fark”大佢，好易得逞嘅。
門：梗係啦，呢幾個月D治安警、特警、司法攪咗咁多單勁料，D市民對佢哋已經失咗信心……
唐：(搶接)咪就係囉，佢話要整肅警隊，改善治安，一定有人話唔啱!咁樣爭取選票眞係高招。
旦：好有理由相信，呢次遞請願信係有政治目的，呢段競選前嘅期間，好多準候選人會為咗爭取選票而搞好多小動作，我哋一定要小心觀察吓其他傳媒點睇呢件事，留意有冇行家中正源某人嘅圈套。
最重要嘅，係加倍小心處理新聞，以免被人利用。
(二)D (各人繼續高談闊論——不過沒有發聲，在他們手舞足蹈之際，Isabel抽身而出，走到台後，回身望望他們，然後向觀衆說話。)
I：我哋每日嘅晏晝，都會經歷呢一段討論時刻，衹有星期日例外，個節目《壹線傳眞》呢，就係星期六晚上播出嘅，主持係Bridget，何令欣。(頓一頓)
討論或者係爭論之後，就會由Danny安排人手跟進嘞，我哋嘅工作，可以話係：“日日如是，但係事事新鮮喎。”
(靜了一會，望衆人)
不過，我發覺自己喺討論嘅過程之中……冇乜機會開聲。唔知幾時開聲，又唔知應該講D乜，有時我有意見嘞，正想組織一下然後開聲喇，哈，點知又被人搶先講咗先。呢，仲有一次，我講咗一段說話，個個望住我，話唔知我講乜喎。
(隔了一會)
日日如是，事事新鮮。
呢，呢一日，我哋又喺度討論另一單新聞嘞。有時，D問題係基於D突發事件而引發嘅。
(此時，唐景輝在白板上畫了一幅街道平面圖，又畫了兩架車互撞在一起的Top－vien圖)
唐：架小巴撞到架Benz嘅車尾，係咪落雨“扇呔”就不得而知嘞，兩個司機拗數，一個十七歲嘅乘客用雨遮襲擊個私家車司機，插傷咗個司機嘅左眼。
B：六點四十五分咁早發生，仲係落微微雨，有乜目擊證人，不過好彩好快有警察到，拉咗個“靚”仔。
D報紙點講呀？
唐：(讀資料)D報紙普遍認為條“靚仔”正一“暴風少年”，以暴力解決問題，此風不可長，所以佢哋認為警方能夠及時制止更嚴重嘅血案，係値得表揚嘅。
旦：直覺上人人都會咁稔嘅。
唐：不過源仲標又有偉論喎。
B：佢話嗰個“靚仔”係“路見不平，拔刀相助”嘅，差佬冤枉好人嘞，咁話。
唐：源仲標認為，暴力行為係出自個Benz佬，唔係嗰個“靚仔”曾狄祺，而家準備發起一次簽名運動，要求警方徹查件事，唔好立亂起訴呢個有正義感嘅大好靑年喎。
I：我哋都有收過佢Send嚟嘅Fax呀。
(Isabel將一張Fax交予Danny)
旦：又係話警方未查淸楚就拉人，哈哈，呢個源某人永遠都想同D差佬過唔去嗰喎。
門：何議員喺澳督府門口都試過被差佬打啦，源仲標仲成時鬧D差佬喎!
旦：大家點睇呀？
(各人互望，Danny最後望着Isabel)
I：(慌張地)我？……嗯……
我——有D唔明呀。
唐：又十吓十吓嘞，次次妳都話唔明嘅。
I：今次我眞係唔明。
門：唔明乜嘢呀？
I：唔明到底個Benz司機同個巴士司機發生過乜嘢事囉。
門：撞車囉，交通事故嘛!“奔馳”咁靚嘅車被架小巴撞到喎!
B：二十吓提出嘅問題幾好吖，嗱，有份小報就話，呢件係“一宗黑社會尋仇事件”，Benz佬VSDicky，同樣係輕輕帶過咗個小巴司機喎。
唐：件事有錯係有疑點嘅。(找出資料)
嗱，源仲標就指出咗幾點：
第一，當時咁早，小巴乘客好少，事後亦都走淸，有人可以提供有力證據。
第二，曾狄祺係唔識傷者陳桂添嘅，冇可能係尋仇。
第三：把遮唔係曾狄祺嘅，如果係報復，條靚仔一定會自己帶武器!
第四，小巴司機以揸車為職業，每日走幾十轉，經過嗰個街口都慣晒喇，有理由無端端會撞車嘅。
門：係，何况大淸早，交通情况都唔會好複雜啫!
B：有張報紙話，傷者陳桂添懷疑係“某社團中人”，平時活躍於回力賭場。佢被送入山頂(醫院)之後，有一大班人揸晒Benz、寶馬上晒去，集結喺醫院，要求探望傷者，又一度鼓噪，要警方交出兇徒喎。
門：你估係落後地區呀？乜可以用私刑嘅咩？
B：收尾呢班人被警方勸喩離去。
旦：不過呢輪風頭火勢，警方一定
住班古惑仔唔比佢搞事嘅。
門：我有揸開車，照資料睇，小巴輸晒，“奔馳”贏晒，個私家車司機如果發火都唔出奇嘅。
B：但係個小巴司機否認比人打喎，衹係話同個Benz佬“推撞”啫。唔知佢係咪怕麻煩呢？
門：嗰個靑年濫用暴力，用雨遮插傷人，肯定係唔啱啦!
唐：對於呢件事，我哋好多嘢要查。第一係傷者陳桂添嘅背景，受傷之後慶合合，跟住似乎又轉為低調喎；
第二係曾狄祺，點解要行兇呢？
第三係小巴司機，佢同傷者之間發生過D乜嘢呢？曾狄祺打人嘅時候佢一定睇到晒。
I：係喎!好多疑問喎!
唐：係哩？仲有呀!把遮係邊個嘅呢？我哋會唔會被條靚仔、個傷者嘅外觀呃到我哋呢？
I：個“靚仔”染晒頭髮，好“Pair”嗰喎!嗰個陳桂添成個“數佬”咁，兩個嘢都好人有限喇!你哋話係咪咯？
旦：有時又唔能夠咁武斷，唔能夠憑直覺去睇事物嘅。仲有……我哋應該注意嘅，係喺傳播媒介度點樣去寫呢件事!而家係顧及傳媒威力嘅時候嘞!
(望了望各人)
旦：明唔明呀？要點樣睇源仲標嘅行為呀？我哋應該點樣衡量佢搞嘅簽名運動呀？我稔……應該視事態發展而定。
唐：不過，搜集多D資料，對我哋判斷一件事係好有幫助嘅。(頓一頓)好!開工!Walkman跟我吖!
門：好呃。
唐：二十吓，一路行一路講吖!
I：唔。
Bridget呢？
B：我有第二個Story，要同Danny傾。
唐：啊。走!
(三人離去)
(三) (剩下Danny與Bridget二人)
旦：好嘞，到妳嗰筆嘞。妳……始終都想做一輯快餐店呀？
B：係。我……好固執呵？
旦：(笑)有時，執着係好過退縮嘅。開始喇。
B：好。不過……我想先同你講——
(Call機響，Danny一看機，面色一沉)
B：唔緊要，覆咗先喇。
旦：冇所謂嘅，做正經嘢先喇。
B：啊。
(但兩人卻各懷心事，竟形成一死寂局面)
B：(鼓起勇氣)Danny，我想同你講——
旦：等等，我覆機先。
(前去打電話，Bridget借意站起來，背着Danny)
旦：喂？咩事呀？(隔一會)
我稔我她冇乜必要傾啦係嘛？
嗯……Racial!聽我講——(望望Bridget，小心翼翼地)唔駛咁認眞係嘛？(隔一會)對唔住喎，我——喂？喂？
(Danny放下聽筒，面露不安神色)
B：嗯……或者，遲D至講吖。
旦：啊，冇事，冇影響吖。(但精神仍不集中，Bridget一直留意着)
旦：OK!
B：開始啦!
旦：好。
B：Danny，對唔住，我想唔做。
旦：Nonsense!
B：眞。
旦：點解？
B：最主要係，澳門太細，人事複雜，好多事都會好敏感，所以我哋可以發掘嘅嘢實在太少。
旦：我知，唔通咁樣我哋就唔做咩？
B：我哋知道嘅嘢，好多都唔講得，咁樣對於我嚟講係好痛苦嘅一回事。
旦：我一早同妳講過喇，我哋希望帶動開放呢度嘅新聞空間吖嘛，當然唔能夠一下子暢所欲言，但係亦有必要自劃禁區吖。
B：不過Danny，妳處理新聞嘅時候，唔通有考慮過大老細咩？麥生係商人，佢都會顧及到同澳門政府、同大陸嘅關係？
旦：麥生冇干預過《壹線傳眞》吖。Bridget，妳放心，好好咁做落去喇。
(Bridget沉思)
B：Danny，仲有一樣呀。
旦：講吖。
B：做新聞，成日都有機會同D行家喺埋一齊。
旦：係吖。
B：但係《壹線傳眞》嘅內容係建基於其他傳媒嘅報導，好似係補充，好似係暴露人哋D報導嘅不足之處，又會好似執人口水尾咁。
旦：於是每次見到D行家，都會唔好意思，因為妳曾經踢爆過佢哋報導得唔準確。
B：就係!所以我哋有朝一日一定會被孤立，被人排擠。
旦：係我意料之內嘅。
B：有有辦法改善我哋同行家嘅關係呀？
旦：呢D係Challenge!呢個世界，任何嘢都會有競爭，澳門人衹希望“以和為貴”，唔慣競爭。《壹線傳眞》可以令到行家提高警惕，減少想當然，不負責任嘅報導。
B：不過，唉!我哋收視率咁低，個節目都有乜影響力嘅，時時好似白做咁。
旦：而家係創業期，一定會經歷呢D時刻嘞!《壹線傳眞》係mCTV新聞報導嘅先驅，堅持落去喇，多我哋一Group，就係一Group，力量係積少成多嘅。
B：(靜止)
旦：點呀？
B：(低沉地)我係個好需要人哋幫助嘅人……不過我同男朋友分手之後，就冇咗一個可以依賴嘅人。
(頓了一頓)
而家接觸新聞同時事多咗，覺得人眞係好無助嘅，好多嘢係受客觀因素影響，人係會顯得無能為力嘅。
旦：妳覺得自己好無助？
B：係。
旦：其實咁樣可以訓練到一個人獨立去解決問題，妳接觸多D新聞，就可以認識事件的背景，從中咪可以學習點樣選擇一D解決辦法囉？
B：咁……要經歷一段困難時刻。
(電話響)
B：(往接電話)喂？……佢喺度呀。……等等!
Danny，有電話搵妳喎，叫唔叫佢接入嚟呀？
旦：OK!(接過電話，隔一會)喂？(面色一沉)？做乜直情打入嚟搵我呀？我叫咗妳——(望望Bridget，B識趣地出去)
Racial……Racial!……聽我講!遲DCall妳好唔好？……喂，咁妳想點呀？妳係咪要錢？……咁妳想要乜啫？……(隔了一會，放下聽筒)
旦：哼!(困擾地)
(想了片刻)Bridget!(B內進)
唔好意思。可以開始喇。呀，等等!
(Danny往撥電話)
旦：我係DannyYu(音“瘀”)，有電話唔好同我接入嚟，OK!唔該。(放下聽筒)
(望着Bridget)
B：有麻煩事呀？
旦：或者係咎由自取啩。
B：幫唔幫到你呀？
旦：(搖頭)好，快餐店!
B：我寫咗D稿。(將稿交予Danny看)
(Danny看了一段時間後)
旦：乜有報紙話過，澳門日銷快餐十三萬九千份咩？
B：佢哋估計每日有百分之六十嘅就業人口喺外便食飯喎，咁咪需求快餐十一萬份囉；全澳學生有六萬五，有百分之四十五會喺街食午飯，即係每日需求快餐約二萬九千份喎，夾埋咪有咁多囉!
旦：(笑)哈……哈……!咁冇基礎嘅統計都有嘅？佢點知有六成人唔返屋企食飯呀？唔返屋企嗰D，都唔係全部去晒食快餐？有人淨係買麵包食，有人會去茶樓餐廳嘛!
B：仲有呀，就算數字係準確嘅，都衹不過可以反映到午間消耗快餐嘅量啫，佢都完全有考慮過晚飯呀!佢當夜晚有人食快餐。
旦：十三萬九千份!唔怪得Bull Balloon會連開三間啦!哈!
B：Blue Balloon邊會咁唔科學呀？人哋D市場調查一定會好完整啫!
旦：係咩？
B：聽講佢嘅“揸Fit人”係個“至叻星”。
旦：至叻星？
B：姓張嘅女仔，喺美國同香港嘅快餐集團做過。
旦：(站起來)唔通係佢？
(四) (Isabel在“街頭”，狀在等人，衹見她東張西望，頻頻望手錶。不久，唐景輝匆匆而至。他們兩人的服裝都不同了，顯示與上兩場的時空有所不同。)
唐：唔好意思，遲咗。
I：輝哥，咩事呀？約我嚟高樓街呢度嘅？(四處張望)附近咖啡室就有，有餐廳喎……
唐：妳眞係十吓十吓嘅!做正經嘢呀!妳估我會請妳鋸扒咩？
I：唔會!(低聲)我又唔係Bridget……
唐：咩話？
I：有嘢。
唐：喂，妳唔記得呢度係邊咩？
(Isabel搖頭)係交通意外引致傷人嘅案發現場呀!
I：(四望)係喎!Benz佬大戰巴士佬嗰度喎!
(以手拍頭)我眞係好十呀。
唐：十得好緊要呀!嗱，架Benz就係喺呢度駛出嚟，被架小巴撞到Pat Pat嘅。肯定Benz佬唔係嚟尋仇，佢點可能咁樣截停架小巴啫？
I：係囉，亦都唔會係嗰個曾狄祺向傷者陳桂添尋仇啫。
唐：Right!
I：a!我今朝仲去睇過肇事嘅小巴呀!左邊車頭凹咗少少之嘛，應該唔會撞得好犀利，我估Benz都唔會好傷!
唐：妳去過巴士廠咩？
I：係呀，訪問過小巴司機!(自負地)
唐：眞係？好嘢喎!
I：駛乜講。
唐：有有去過總部呀？
I：警廳話有進一步消息，但係暫時唔能夠接觸個“靚仔”喎。
唐：啊!
I：你呢？
唐：傷者就唔肯接受訪問，哈!咁低調，好出奇喎。
I：冇啦？
唐：我唐景輝都會咁“渣”嘅？喂，返電視台吖，比我段片妳睇，我訪問咗一個關鍵人物。
I：係咩？邊個呀？
唐：返去先啦!
I：好，喂，睇咗我段先呀!
唐：得!
I：咁仲等咩呀？
唐：Walkman泊緊車，佢會嚟補番幾個Shot。
(燈熄)
(五)a (螢光幕上出現Isabel的影像)
I：(手持咪)用雨遮插傷人嘅少年曾狄祺，到底係暴風少年定係路見不平拔刀相助呢？當時喺事發現場的小巴司機阿漢，就應該知得好淸楚。
不過，阿漢就唔肯接受訪問，最後衹答應用背面示人啫。
(鏡頭一轉，衹見影着Isabel，但畫面帶有阿漢的背影。)
I：阿漢哥呀，請問當日係點樣發生意外嘅呢？
漢：唔小心囉!……撞到架Benz右邊車尾囉……
I：嚴唔嚴重呢？
漢：冇……咩……小意思啫。
I：跟住呢？
漢：我……哋……咪落車睇吓囉。
I：邊個“我哋”呢？
漢：我同嗰個司機囉。
I：你哋當時點呢？有有乜嘢衝突呀？
漢：冇!有乜衝突啫？嗯……咁……勞氣就有嘅!
I：你勞氣？
漢：佢!
I：佢……對你做咗D乜嘢呀？
漢：鬧囉!
I：仲有呢？(漢不答)有冇郁手呀？
漢：(想了很久)冇……唔記得啦……落緊雨……好混亂囉……嗯……咁，推撞吓咁啩……唏，唔記得啦!
I：當時小巴上便有幾多人呀？
漢：三兩個啩。
I：佢哋睇唔睇到呀？
漢：唔知呀……好亂吖嘛!
I：係咪有一個就係插傷人嘅男仔呀？
漢：唔知呀!唏，唔好再問我呀!大佬!(走開)
我唔係坐寫字樓!(鏡頭追着他)
我唔係見唔到人!大佬，我一日截咁×多人我唔想得失人呀，我仲要搵食!
I：(追着)你揸咗小巴幾耐呀？
漢：五年啦!
I：有有發生過意外呀？
漢：冇呀，未試過!(狂奔離去)
(鏡頭影着Isabel，她聳聳肩，CutOut。)
(演區燈亮，衹見Isabel，唐景輝及溫門在座。)
門：個司機似乎有難言之隱喎。
I：佢話有三幾個乘客，即係話有目擊證人喇。
唐：Right!其中一個叫做阿培。
門：你點知呀？
唐：我訪問咗佢。
I：眞係？
唐：嗯……
I：厲害厲害，師傅的確係師傅。你點搵佢？
唐：去片先喇!
(螢光幕上影着一三十多歲的男子)
培：當時係六點九咁上下喇……落緊雨，天色比較暗。(頓一頓)之前有個着到好In嘅男仔上車囉，仲同埋一個串妹上嚟嘅，大吵大鬧，嘈喧巴閉嘅……一上車就走咗去最後排坐咯……兩個人瓜瓜叫，個司機咪叫佢哋“唔該比錢”呀，咁囉，條靚仔仲鬧返個司機轉頭……嗯……可能個司機分咗心囉，咪撞車囉!
唐：(鏡頭外)撞車之後點呢？
培：個司機咪落車囉，有幾耐條靚仔就衝出去，仲搶咗我把遮，插傷嗰條友咯。
唐：條友？
培：賭場D疊碼仔嚟嘅。
唐：你點知呀？
培：我喺賭場做嘛。
唐：跟住你點呀？
培：我怕麻煩，咪走咗囉。
唐：遮都唔愛？
培：我……我返七點!我唔想……遲到吖嘛。
唐：事後有聯絡警方？
培：冇。
唐：你而家又會同我哋合作嘅？
培：覺得有D內疚囉……應該早D挺身而出嘅……而且……報紙話有人想同條靚仔平反，歌頌佢係抱打不平嘅，我稔……我有責任對你哋講出眞相囉。
(晝面Cut Out)
D、門：啊!原來係咁!
I：唉，乜嘢“毅然勇敢對抗暴力嘅靑年”喎!
唐：正唔正？
I：輝哥!我服咗你!請受徒兒一拜!
唐：平身!
I：謝師傅!a、輝哥，你點會搵到呢個阿培？
唐：頭先妳都睇到高樓街嗰度有間咖啡室喇!我問過個老板嘞，佢話事發嘅時候，佢見到有幾個乘客喺小巴上便急急腳咁落車，其中一個係着住STDm制服嘅，我推算佢當時係預備返工。(頓一頓)
於是我推算呢個人嘅返工時間，呢幾日都喺慈幼(學校)個巴士站度“捕”佢，果然，喺嗰幾段時間都被我見到一個着STDm制服嘅“雀籠佬”，於是我頭先咪等佢放工，同佢做呢次訪問囉!
I：好嘢喎，輝哥!
唐：做新聞，食腦嘛!
(Isabel沉思，計上心頭)
(六) (Danny在舞台一角，那裡有一張小桌，兩張椅子。桌上有小花、一隻啤酒杯，他在抽煙。
(一個女人出現，一副職業女性模樣，她就是張穎緹，Victoria，二人四目交投，良久，Danny站起來，待張坐下才坐下。)
張：(望四週)好似唔同以前咁嘅，間餐廳……
旦：轉過兩手啦，雖然個名就仲係Laéfense。
張：你仲係成日幫襯？
旦：念舊吖嘛。
張：(笑)哈哈……念舊？九六年最佳笑話!乜你唔係最鍾意新鮮刺激嘅咩？
(侍者來到，遞上餐牌)
張：比杯Capuccino我。
侍：OK。
旦：仲係Capuccino？
張：我先至係念舊呀，如果唔係又點會兜一個圈又返番嚟澳門呀？
旦：妳都返咗嚟好耐囉喎。
張：係，奇喎，一直都碰唔到嘅，可能澳門多咗好多人，又塡海多咗好多地啩，相信以後D人唔可以講：“澳門眞係細”咁嘞。a，D男人走私咪有咁容易撞到熟人囉？
(Danny不理會，衹顧呻了一口啤酒)
旦：忙完未呀？Victoria。
張：好D喇。於是咪稔起，都要搵吓你囉。
旦：應該約我上去BlueBalloon見識吓喇。
張：點好意思約你去快餐店呀？而且我規定DStaff唔可以幫襯自己嘅快餐店嘅，我都要以身作則。(向Danny遞咭片)
旦：會唔會開第四間呀？
張：暫時唔會。(侍者拿來咖啡)
(Call機響，Danny低頭看機)
張：要覆機呀？隨便吖。
旦：啊，唔駛。(低頭又看，似有不滿神情)
張：冇乜緊要嘢吖嘛？
旦：D煩人。
(張盯着Danny)
張：Danny!仲同以前一樣!哼!好彩我離開你離開得快!我眞係好明智!
旦：有乜嘢嘅!
張：你以為冇乜嘢，但係人哋會認為有乜嘢!我當年嘅抉擇好正確。
旦：妳去美國發展吖嘛，我都要為妳嘅前途着想嘅。
張：吓？乜你原來咁偉大？係咪呢幾年你一路都呃緊自己，因為Victoria要去美國，所以先至同你分開……係咪呀？Danny？
旦：妳而家事業發展得好好吖，好彩去過出便兜咗一次啫，呵!
張：唔好呃自己嘞，係好彩我冇再跟住你啫。
旦：妳心頭高啫，或者你會覺得做新聞嘅……有乜出息啩。
張：係喺呢度有乜作為啫……。你覺得你哋可以知道消息嘅全部，可以報導消息嘅全部咩？
旦：咁我相信妳未睇過《壹線傳眞》，未知道呢個節目嘅目的嘞。
張：好對唔住。失覺晒。推銷吓喇!
旦：口講冇用嘅，逢星期六晚八點，睇“壹線電視”喇。
張：新聞對於我嚟講，冇乜嘢直接嘅效用……
旦：妳衹對生意有興趣。
張：唔係呢個問題，而係……新聞衹係比到D間接效用我。
旦：點解咁講？
張：當我知道一單同自己個Field有關嘅新聞——即係外界發生嘅一件事之後，我可能會攞到一D資訊，然後調節自己嘅行為，呢D咪係間接效用囉。
旦：多睇新聞咪會得益囉。
張：弊在經過你DGate－Keeper過慮之後，audience好難收到準確嘅資料呢，咁我又點可以從中得到啓示，作出適當嘅判斷呢？
旦：要作出判斷都唔係全靠D新聞啩？
張：當然唔係喇!人嘅學識同能力最緊要，何况新聞嘅壽命太短啦，有時半個鐘頭之後已經變咗舊聞嘞。
旦：呢，所以我鍾意做新聞，因為好刺激，永遠新鮮。
(Victoria望着Danny)
張：Danny，新聞同女人有乜嘢關係呢？
旦：吓？妳想講乜嘢？
張：你喜歡新聞嘅新鮮、刺激……，同樣你亦都鍾意結識不同嘅女人，因為佢哋同你面對嘅新聞一樣，日日不同，件件新鮮。
旦：Victoria，咪用D咁嘅比喩!
張：我當年衹不過係副刊，人哋睇報紙，一定會睇新聞版，就算冇睇副刊一日都冇乜大問題，你衹係當我係副刊，自己喺出便不斷咁追求新聞。
(Call機又響)
張：又有新聞呀？覆機喇……我唔介意……啊，你用手提我咪行開囉。
旦：唔好意思，我去……(離座)
(Victoria望着Danny，搖頭)
(七) (燈亮，兩女孩分別坐在一沙發上及地上，一是Isabel，另一位染了金髮，她叫Coric，吳嘉綸，一副“Pair”樣。)
嘉：喂，有嘢快講，有屁快放!
I：Coric，咁靜局嘅，哈，居然可以喺妳屋企搵到妳。
嘉：喂!想點啫？
I：Coric，喺屋企仲好呀，風大雨大呀，外便。
嘉：阿姐見慣風雨呀!
I：(鼓掌)好嘢!喂，妳，唔去搵吓曾狄祺嘅？
嘉：搵佢把——把鬼呀？
I：講眞，冇乜嘢就唔好搵佢嘞，無謂無端端曝光吖。
嘉：咩意思呀？曝光咪曝光囉？
I：吓？喂，唔通妳唔知大圈想買起曾狄祺咩？
嘉：買起咪買起囉!
I：吓？買起咪買起？喂!妳唔關心妳條仔嘅咩？
嘉：我條仔？好難啦!佢咩Quali想同我平起平瞓呀？
I：嘩，妳好絕喎，條仔一有事就調頭“Yang”呀？
嘉：挑，佢有事同我無關!
(Isabe1想了一想)
I：唔係喎，聽講大圈想冧埋妳咋!
嘉：咩話？(大驚)
喂!關我咩事呀？做乜要冧埋我呀？佢唔係我條仔呀!佢死佢事喇!抵死——(窒住)喂，係咪眞？
I：咩係咪眞？
嘉：眞係有人想殺我？
I：講係咁講囉!
嘉：妳點知？妳到底係邊個？
I：我咪話……曾狄祺係我男朋友個細佬囉。
嘉：Dicky有大佬？
I：吓？嗯……有!佢……冇同妳講過咩？
嘉：車，佢話佢有跟大佬嘅。
I：係……眞嗰D大佬呀。
嘉：佢點會講佢有有大佬啫？黐線!我識咗佢三——(收口)唏吔？
I：妳識咗佢冇耐？
嘉：唔關妳事。
I：我稔……唔會好耐。
嘉：點解？
I：我哋都知道Dicky以前有條女啦。
嘉：唔出奇吖，冇至奇，(鄭重地)喂，佢眞係唔係我條仔呀，佢死佢事呀，咪連累我呀!喂，妳喺邊度聽返嚟……話有人想買起埋我？
I：嗯……D差佬話嘅。
嘉：好彩我冇——
I：好彩妳有出街!妳其實都估到!估到有人會對妳不利!
Coric，妳唔駛扮嘞!妳呢幾日都驚緊!
嘉：有乜嘢人可以幫到我？
I：妳呢幾日有冇留意報紙消息呀？關於呢件事嘅。
嘉：有!話有人想同Dicky平反吖嘛!戇居。
I：點解呀？
嘉：妳話妳係Dicky大佬個女朋友吖嘛，妳識Dicky幾耐呀？
I：嗯……有……成年幾囉!
嘉：咁妳梗唔會覺得佢係好有正義感嗰隻喇。
I：吓？嗯……佢喺我面前又——
嘉：條友被人話係英雄喎，唉，笑死呀!佢想喺我面前Show Power咋!點知個Benz佬係叠碼仔啫？呢，而家大鑊喇，被佢玩死呀!
I：Coric，妳好冇同情心喎!係Friend都唔會咁冷淡!
嘉：挑!唔怕同妳講，我當時識佢三日咋!有咩感情咩？同佢做人世呀？
I：吓？咁嗰日咁早去邊呀？
嘉：唔知，都冇返過屋企，玩天光，點知落雨，見到有巴士咪稔住遊車河囉!
I：識咗三日咋喎。
嘉：So What？喂，妳唔係大我好多啫，咁老土？但係呀，呢D嘢玩過就算啦，佢惹到蘇州屎又High埋我呀？好難啦!
I：所以到佢插傷咗個叠碼仔之後，妳就咁乘機速較咯喎？
嘉：梗係咯，留底搏乜呀？點知個死仔踢爆埋我!
I：佢又可以話到比差佬知，點樣可以搵到妳嘅？
嘉：我同Dicky喺佳景識嘛，佳景D人識我嘛!(隔了一會)喂，妳嚟淨係問我呢D嘢？
I：唔係，我話比妳知，叫妳出入小心吖嘛!知喇嘛？
(此時一對中年人進)
I：我走啦，一切小心!(跟中年人打招呼後便離去)
母：Coric，邊個嚟？
源：喂，Coric，妳同佢講咗D乜嘢呀？
母：點解佢會叫妳小心D？
源：妳冇照直同佢講吖嘛？
(Coric一言不發，轉身入內)
母：Coric!Coric!
源：妳睇吓，妳都唔知點敎女嘅!
母：D臭脾氣似足佢死鬼老豆!喂，會唔會係差婆嚟？嗰個!
源：差婆邊有咁“靚妹”？……又唔會係佢D同學呃!
母：(想了一想)喂，佢被D差佬問得兩問，會唔會露出馬腳？
源：放心喇!嘿嘿!
(八) (燈亮，Bridget坐在錄影廠，其他同事在一角看着她。)
B：傳媒，有時會變得不近人情，破壞咗好多人一D美好嘅感覺。或者，有人會覺得我哋會威脅到人類嘅基本權利，但係眞實嘅一面往往都係有若干缺陷嘅。
暴風少年嘅事件，曾經一度比到市民截然不同嘅感覺，佢倒底係咪一位毅然勇敢地對抗暴力嘅靑年呢？
幾日以來出現咗相反嘅報導，件事本身亦都極具爭議性，所以，今晚《壹線傳眞》我哋想同大家重溫一下。或者大家可以分析一下，呢種係咪一種正義行為，値唔値得宣揚。
(停了一兩秒)
對於七月二十九號早上六點四十五分所發生嘅小巴乘客暴力事件，本節目打算為大家披露我哋再次調查所得嘅最新資料，從中揭開事件嘅眞相。
我哋搵到當時喺小巴上便嘅兩位乘客，其中一位男子曾經目睹嗰位少年嘅不良行為，小巴司機因分心而撞車，後來少年行兇用嘅雨遮，都係呢個男人嘅。
另外，同嗰位少年一齊上車嘅一位少女，亦都證實少年打傷人唔係出於正義感，衹係一時逞英雄啫——
旦：Stop!
(錄影廠區燈亮)
B：咩事呀？Danny。
唐：未完，仲有——
旦：a!(揚手)
(Danny在踱步沉思，各人感到奇怪)
旦：傷者陳桂添而家點？
唐：胸口有乜大礙，但係左眼就有咗囉。
旦：佢冇追究咩？
唐：好低調，條友衰過幾次嘞，最近仲同一單偸運軍火案有關，聽講大圈唔想攪大件事，况且陳桂添衹係D二打六啫!
旦：條靚仔肯定唔屬於任何幫會嘅？
唐：流料嚟咋!有背景嘅，不過以前偸過電單車，另一次喺卡拉OK打交被人拉過。
旦：你哋點樣搵到D乘客？
唐：我知道有個雀籠佬，可能會係小巴嘅乘客，而且目擊血案發生，於是我推算佢D返工時間，花好多時間去捕，終於被我見到佢，咪同佢接觸囉，仲拍咗一段訪問返嚟。
旦：個靚妹呢？
I：我搵到!係呀!好……辛苦先至搵到咋!
旦：佢都算同妳合作喎!
I：唔係呀!好串佢!我話我係曾狄祺大佬個女朋友咋!
衆：哈哈……!(Danny例外)
I：我仲偸錄佢嘅說話!
(Isabel掏出一具小型錄音機)
最初佢走咗，曾狄祺收尾篤佢出嚟之嘛，差佬咪去搵佢囉。不過據D差佬講，好奇喎，兩次嘅口供有唔同，第二次佢話，曾狄祺係抱打不平而出手嘅。
門：但係佢又唔係曾狄祺條女喎。
唐：咁至奇。
(Dnny沉思)
B：Danny，點呀？
旦：我稔唔好再跟落去。
衆： 吓？點解呀？
衆：唔係吖嘛？
唐：我哋追得好辛苦嗰喎!
I：係呃，嘥咗唔少時間!
旦：第一，呢件本來係一件小事，輕微交通意外引發爭執，最後有人受傷。如果我哋跟呢單嘢，有D小題大做。
門：但係最初你都有份“剔”呢件新聞嗰喎。
旦：我擠嘅重點，在於事件發生嘅時間，當時幾乎有記者On Duty，於是人人道聽途說，各有不同版本，呢件事去反映做新聞要好負責任至得。
唐：但係我哋亦有責任去話比人知件事嘅眞相係點嘛!
旦：有錯，到咗源仲標提出話曾狄祺係路見不平嘅時候，件事就有戲劇性嘅發展。不過我想講嘅第二點就係，件案警方仲查緊，我哋搜集返嚟嘅料好多唔能夠就咁講出去!我哋要負法律責任!
B：咁係咪連源仲標嘅觀點，其實都有問題呢？
旦：係嘞，呢個先至係我哋要追嘅重點。仲有第三，你哋犯咗一個錯誤。
I：乜嘢呀？
旦：我哋呢個係一個嚴肅嘅新聞節目，唔係“追擊”唔係“睇眞D”，但係，似乎你哋不知不覺間跟咗佢哋。
第四，你哋以為你哋做緊“九零零重案追兇”定係“刑事偵緝檔案”呀？我哋係追新聞唔係查案!
(衆人默靜)
花咁多時間去“捕”，用錄音機偸錄，呢D係乜嘢手法？你哋自己稔吓!
(全場再鴉雀無聲)
B：即係話，我哋反而要追源仲標嘅動機!
旦：我嗰日已經同你哋講過喇。
I：係呀!
門：(打Isabel的頭)傻？咁大聲!我夠知係咯。
I：唔係呀!
唐：係定唔係呀？十下十下!
I：我差D唔記得，嗰日我離開Coric屋企嘅時候，有一男一女返嚟，男嘅好似係源仲標呀!
唐：好似？妳唔認得源仲標嘅咩？
I：我緊張吖嘛……因為我……好開心可以收到好料吖嘛，又要顧住個錄音機。
門：源仲標，唔係個女仔嘅老豆呵!
I：唔係，Coric姓吳，吳嘉綸呀。
B：源仲標同吳嘉綸嘅關係，同源仲標嘅言論應該有關。
旦：冇錯，呢樣嘢我哋可以追，至於條靚仔有冇罪，等D差佬Follow Up喇!
我有事要出去。
(Danny離去，錄下四人呆着)。
(九) (Danny由台左出，後面跟着一個衣着趨時的女子，她就是Racial。)
(燈光角度較斜，偏黃。有馬路汽車及雜聲。)
(Danny揚手)
旦：Taxi!
(Raxial立刻搶前，把Danny的手按低。)
旦：飯又食咗咯，嘢又講完咯……喂，Racial，我仲要返電視台做嘢!
R：九點囉喎……但係你始終未比明確答覆比我喎!Danny!
旦：咁妳都仲未明？妳應該意識到喇？畫公仔唔駛畫出腸，然後用箭咀指住，寫明“這是腸”嘅!
(兩人靜默了一會)
R：你始終掛住以前個老婆？
旦：Victoria？嘿!我最近先至見返佢咋喎。
R：咁同掛唔掛住有關。
旦：我同佢眞係唔啱嘅，雖然當年佢提出離婚令到我好沮喪，但係想深一層，我好難同一個咁好勝嘅人過一世。
R：最衰嗰陣時又去咗咗日本……如果唔係……
旦：如果唔係妳就可以成日嚟陪住我!Racial呀!雖然我哋以前係Date過，但係呢D不過係妳讀中學嘅時候嘅事喇!
R：但係嗰段經歷係最難忘……
旦：妳當時仲細，我亦都未定性……
R：咁幾個月之前你算係定性未呀？嗰晚點解你又會同我——
旦：Racial，呢度係條街嚟!咪講埋呢D——
R：(望後面)好吖，入去坐低傾喇!
旦：(一望)BlueBalloon？我唔入。
R：入去喇!你話唔想喺馬路傾吖嘛!
旦：喂!快餐店嚟，何况……我哋啱啱食完飯，何况我要返電視台，更何况裡便咁多人!
R：一係截車一齊返電視台吖。
(拉着Danny，揚手“截”的士)
旦：對唔住Racial!(撥開她的手)
(此時，Victonla，藍天雲與源仲標在B.B.內出來)
藍：咦!你咪俞生？壹綫電視台嗰位吖嘛，係嘛？
旦：係!(立刻向源及藍遞上咭片)多多指敎。嗯……張小姐就…識嗰咯…(源與藍亦遞上咭片)
藍：係咩!啊!(想了一想)呀!俞生早輪有同事嚟過我度，訪問過我關於澳門嘅快餐店業務嘅，唔知……幾時會出街呢？
旦：啊，如果安排咗出街，我哋一定會通知藍女士妳嘅。
藍：好呃。唔該。
旦：妳哋……好勤力喎，咁夜……仲喺度……
藍：啊，我哋準備緊聽日嘅招待活動吖嘛，一連三日分別喺三間分店招待幾個社區中心、老人中心嘅婦女、老人家，免費享用我哋嘅美式快餐，呢個係我哋嘅推廣活動之一。咦？我哋上個禮拜舉行過記者會，你哋有收到通知咩？(望Victoria)
張：啊，據我所知壹線電視台有正式嘅新聞部嘅，或者佢哋係比較難處理呢個新聞嘅。
藍：我哋有喺佢哋度做廣告嗰呵!
張：當然有喇!
藍：若果有興趣，歡迎你哋呢幾日嚟我哋度睇吓嗰D熱鬧情况嘅。
旦：我相信我哋對於……點解你哋會搞呢項活動有興趣D。
藍：我相信我哋嘅顧客唔會局限喺細路仔同年靑人嘅，中年人、家庭主婦甚至老人家都啱，眞係可謂老幼咸宜，顧客層面會比其他快餐店為廣喎!呢，因為我哋所用嘅材料，特別係調味料呀，係經過悉心調製，特別適合老人家嘅，絕對健康嘅，就算係雞蛋呀——
旦：(截住)我稔我哋咁講落去……有排講，呀……Racial，不如妳走先吖。
R：唔駛，我等埋你。
藍：你太太？
旦：朋友，Racial。
(Victoria面色有點難看，但又不造聲，反而Danny卻甚為難。)
源：呢，藍氣球嘅食品呢，係張小姐喺美國偸師返嚟——
藍：係學習!
源：呢，我雖然四張幾，都好鍾意佢哋嘅加州漢堡同埋……同埋……咩話？
藍：香菇雞扒包呀!
源：係，香菇雞扒包。記性好差!
旦：源生講笑啫，你日理萬機，仲咁關心社會，仲特別關注澳門嘅治安問題，少D魄力都唔得啦!
源：唏……差D囉!幾年前地產旺嘅時候，人都精神D嘅!哈哈哈!
旦：咁就要成日嚟BlueBalloon啦，旣然D北菇雞扒包咁正!
源：係香菇雞扒包呀!
旦：啊!對唔住!好啦，要行啦，第二日傾過!
源：有機會嘅!
衆：Bye－Bye!
(源、藍及Victoria三人目送二人離開，Racial更拉着Danny的手臂，Danny狀甚無奈。)
源：呢個姓俞嘅好唔識撈嘅，點可以喺呢度做記者？
藍：聽講專唔肯賣賬嘅。
源：我上次搞請願遞信，搞簽名運動呀，反應最冷淡就係佢哋壹線電視台嘞!
藍：Victoria，妳識佢好耐啦？
張：嗯。
藍：不嬲係咁？
張：嗯。
源：做人要睇時勢得，特別係喺呢度呀!
(後面走出一個少女)
P：Bye－ye藍小姐，走啦源生，Bye－Bye!張小姐!
衆：啊!Bye－Bye!
張：Pionia，搞掂晒D嘢啦？
P：係呀!冇問題嘞!
藍：妳媽媽嗰間中心聽日定後日嚟呀？
P：後日，不過係去南灣分店。
藍：啊，好吖。
張：Pionia，今次眞係唔該晒妳舖橋搭路喎。
P：唔好咁講!
張：好啦!早D返去休息喇!
P：啊，Bye－Bye!(離去)
張：Pionia係一個好乖好聽話嘅女仔。
藍：聽話!至緊要係“聽話”!
源：好，我都走喇，我要再跟一次阿全同阿謙佢哋D禮品包搞掂晒未呀!咪聽日叫起手……係嘛？
藍：快去喇!
源：我今晚返自己度啦!
藍：唔!
(燈熄)
(十)a (大螢幕播放了十多位市民的街頭訪問，內容環繞着本澳的治安問題。其中最後一個，原來是警員之妻子，她持着相反的意見，認為“警員也是人”，不應經常指責警員，並指非局內人不知匪徒之兇狠……)
(台右區燈亮。)
輝：Cut啦!(螢幕上停止了播放)
I：點呀？
輝：有乜大作用，睇吓睇吓，發覺有咩幫助。
I：輝哥，你想有咩幫助呀？
輝：一般小市民嘅睇法都係對警方有微言啦，源仲標識得捉心理，利用市民對警方嘅壞印象大做文章，如果將呢D訪問“Ngung”出街，咪等於幫咗源仲標？
I：但係……D人眞係咁講嗰喎!我哋衹能夠咁樣播嘅啫!
輝：我哋做Editing嘅，有時要做得聰明D。嗱，二十下，做新聞嘅，少不免會有自己嘅立場，我哋係Gate－Keeper吖嘛，我哋可以主動控制資訊嘅流通咯!
I：咁即係點呀？
輝：點？稔吓。
I：(疑惑地)稔唔到呀!
門：即係話，當街頭訪問之中如果有正反兩種意見嘅話，其實我哋係可以選擇正反意見嘅人嘅訪問，用數量嘅差，嚟影響受衆嘅觀感。
輝：咦？Walkman講得好好喎!有錯，就係咁!我哋一路都唔妥源仲標，最低限度都唔好比一D有利於佢嘅嘢出街吖!
I：吓？咁……咁……
門：咁同大陸有咩分別？
輝：大陸？……哼!我至憎呢個大陸佬!
門：嗯？
輝：(向Walkman)唔係話你呀!呢，嗰條友講過呀!我嗰次訪問完佢呀，嗰次呢……
I：點呀？佢嗡乜呀？
輝：佢咪喺度批評D差佬嘅？佢話，睇吓D西洋鬼惡得幾耐，九九之後，澳門就係佢哋嘅世界嘞，咁話。車，不可一世!鬼咩，嚟到冇耐就掘到金，大口氣到死。
I：係呀，呢D咁嘅暴發戶，眞係招積到死!
門：不過，輝哥…我哋如果咁樣攻擊佢…好似唔係幾好…嗯…
輝：邊係攻擊啫？最多係話…封鎖佢嘅言論，等我哋唔好做佢嘅宣傳工具啫!呢，好似民主派D消息咁，咪一樣被某D報紙封鎖？
I：咁…即係要點呀？
輝：唉，我都唔知可以點做!講出嚟就好聽呀，傳眞喎!其實好多嘢就唔可以講!呢，源仲標表揚乜嘢“暴風少年”單嘢呀，我哋“抄”得咁辛苦，又被Danny摺埋!其實嗰條靚仔，同埋佢條女，呢個問題靑年嘅題材已經可以講喇，你哋又話冇新意。
門：冇嘢嘅，大家討論吓啫!愈辯愈明吖嘛!
輝：愈辯愈明？好，我就認為，嗰D訪問片斷唔好出街，一係，衹係揀一個，再加埋嗰個差佬老婆嗰段，That’s all!
(衆人默靜，唐景輝亦不造聲)
輝：你哋可以考慮吓先嘅!我出去行吓，呢度空氣唔好，係冇“新聞自由”嘅空氣呀!
(離開了房間)
I：咁點呀？
門：唔合作有得做嘅……(隔一會)等Danny佢哋返嚟再傾喇，有嘢係唔可以解決嘅。
(唐景輝突折返)
輝：二十下，有個女仔話搵妳!
I：我？
(Coric在門口出現，此時唐景輝再次消失)
嘉：妳眞係喺呢度!
I：Coric？(Coria男裝打扮，Isabell一時也疑惑)
嘉：妳呃我!又話自己又乜又七，原來眞係記者!好彩我眼利!喺電視見到妳!好彩我仲認得妳!喂我警告妳呀!我同妳講嘅嘢妳唔好穿出去呀!
I：Coric，我冇呀!
嘉：我嗰次全部講大話，係老點嘅!妳咪信呀!
I：嗰件事我哋有再Follow啦!，唔信妳問吓佢咯!
門：係呀，摺埋咗啦!
嘉：我唔想死呀!我唔想被人打被人斬呀!你哋咪害我呀!
I：放心喇，冇人會害妳嘅!
嘉：有!尋晚呀——(住口)
I：做咩呀？有人打妳？
嘉：有嘢啦!
I：講吖!(計上心頭)嗱，行吖!我有電單車。
嘉：去邊呀!
I：出去吖!(向Walkman)我出去一陣!
門：啊!
(二人離場，燈熄)
(十一) (Corie與Isabel在台左舞台上出現，Corie還是有點閃閃縮縮，而Isabel則拿着一個電單車頭盔。)
I：戴住喇!
嘉：黐線!
I：妳驚吖嘛，咪多重保護囉!
嘉：嚟融和門做乜Q啫!
I：靜D吖嘛，妳想講咩呀？
嘉：講？冇嘢!
I：個海嚟!阿水聽到咩？
嘉：個海嚟!有人追嚟點呀？跳海呀？我淨係游到半個橫塘咋!
I：成條水爺棟喺嗰邊呀，有乜好驚呀？有人斬妳實斬埋我，佢哋鬼知我係邊個咩？(Isabel坐下)坐喇!
(Coric仍站着)
I：妳頭先話尋晚咩話？
嘉：咩呀？
I：信我喇!唔爆就唔爆!(隔一會)
呢單Case比老細Drop咗啦!呢，除非係關於源仲標啦，咁或者仲會——
嘉：(插咀)唔好提個賊佬!
I：妳好憎佢嘅咩？(隔一會)
喂，如果唔係同佢有關嘅咪講囉!
(IsabeI望着Coric，良久不造聲)
嘉：Dicky尋晚喺監倉被人打!
I：係咩？(驚訝地)
嘉：妳都唔知？點做記者？
I：報紙電台電視台都有賣!
嘉：妖!屎唔屎D呀？要靠睇報紙睇電視，冇Q用!
I：(為之氣結)唉，係啦係啦!
嘉：咁又係嘅，監獄又點會揚出嚟吖？打交日日都有喇!唔重傷死人送山頂都唔會有人知喇!
I：Dicky點呀？
嘉：死唔去嘅。
I：你點知？
嘉：唏，有Friend做獄警嘛!
I：點解會被人打嘅？大圈班馬？
嘉：佢同大圈班友分咗倉，係D友唔妥佢做咗救人英雄吖嘛。
I：(想了一想)喂，Coric，妳同我講過Dicky搶人把遮插嗰個陳桂添嘅，佢想逞英雄於是闖禍吖嘛……
嘉：係呃，唔通行俠仗義咩？
I：但係後來妳又做乜改口供嘅？
嘉：妖!
(Isabel在等Coric說下去)
係源仲標囉!一日都係佢D屎橋囉!(停)
佢敎嘛!嗱妳知好啦!
I：OKOK!
嘉：佢想整D差佬囉!
I：整？
嘉：唏吔!我唔識講呀!整囉!
I：打擊？打擊……打擊警方嘅威信!
嘉：係咁上下啦。(停)
搞到我一身蟻，比假口供嚇到我死!
I：車，D差佬好易聯想到嘅啫，妳想同Dicky洗脫罪名，所以咪話佢抱打不平囉!
嘉：咁咪即係“La”乜嘢上身囉!妳話嘞，條源仲標抵唔抵死咯，害死我!
I：妳當初又肯？
嘉：佢同我老媽子夾埋猛喺度講吖嘛，我嗰時個心亂到死，咪落咗“搭”囉，點知收尾稔淸稔楚，唉，返唔到轉頭咯。
I：妳媽咪同源仲標好熟？
嘉：(怒)唔知佢哋咁多呀!
(兩人“無話可說”，但Isabel卻不住的看Coric的情緒變化)
I：升幾年班呀？
嘉：中三。
I：嘩，妳成日都周圍Wet嗰喎……嗯……冇上夏令班呀？
嘉：話之佢!我老媽子捐錢比學校，妳話嘞，我……可以點啫？唔會讀唔到嘅!
I：啊，明白明白。妳媽咪好多生意嗰喎。
嘉：咪……做地產囉，收租囉……投資囉，而家咪搞快餐店囉……。
I：理生意多過理你喎!
嘉：駛乜佢理呀？
I：妳……嗯……爹哋呢？
嘉：好多年前，走咗囉!(停)
佢話要移民去紐西蘭吖嘛，一個人去咗先，我哋以為遲D至去喇……(停)
原來，佢係約定同個女人去嘅!算喇!(停)我媽咪……咪搏命自己搵錢囉……(停)
佢同個衰佬一齊炒樓嘛……
I：蝦，妳媽咪又會同源仲標咁夾嘅。
嘉：互相利用啫!九九啦阿姐，梗係走大陸線喇!個衰佬同大陸熟吖嘛，又猛捐錢返鄉下，老媽子又想做大陸生意吖嘛!
(兩人靜止)
I：喂，Coric，老實同妳講吖……嗰次我話有黑社會想斬你，我作咋!
嘉：(一手推Isabel)妖!(怒)嚇Q死我呀!但係……我眞係驚!
I：少D去街囉!不過，妳都識得扮到咁。
嘉：放暑假喺屋企好悶呀!
(大叫)呀……!(抱頭，蹲下)
寫個Call機Number俾妳吖，得閒Call我!
I：唔!
(Isabel遞上一張紙，燈熄)
(十二) (燈亮，衹見Victoria心焦地踱步，藍天雲匆匆而至。)
藍：點呀點呀？班師奶同阿婆點呀？
張：醫生仲同佢哋睇緊。
藍：點會咁大件事？
張：初步懷疑係食物中毒。
藍：幾多人入咗嚟呀？
張：約莫二十個。
藍：吓？咁多呀？咁……眞係可能係我哋D食物喎……喂，Victoria，係咪……(望四周，低聲)D嘢唔衛生呀？
張：我估係處理程序出咗D問題，天氣太熱囉，早排香港接二連三都發生好多單囉。
藍：唉!當黑!見唔見有記者嚟呀？
張：仲未見，不過就快到啦!
藍：度一度點同D記者講，嗯……!
(此時Pionia與母親惆悵地在內行出來。)
P：藍小姐，張小姐。
張：Pionia，妳媽咪冇事吖嘛？
母：我冇乜事。有心。
P：佢係社區中心嘅員工吖嘛，佢晏畫都掛住服侍其他人……
母：我食得好少嘢啫，唉，稔唔到……死啦，都唔知佢哋會點。
P：媽，唔駛咁擔心嘅!
母：唔擔心就假嘞，唉，個個都上咗年紀嘛……人人都實怨死我喇!可能連份工都冇埋……唉……(哭泣)
張：而家D病人情况點呀？
P：又疴又嘔呀……佢哋下畫離開咗快餐店，返番屋企之後有D人就陸陸續續覺得唔舒服，於是咪入醫院囉，我阿媽知道咗，就逐個打電話比佢哋，咪一齊集中入嚟鏡湖(醫院)囉。
張：頭先有醫生話應該唔會係霍亂喎，可能係D乜嘢大腸桿菌嘅問題。
母：唉：希望佢哋大步“Lam”過喇。
藍：而家有幾多人入咗嚟呀？
P：十九個，但係仲有兩三個去咗睇私家醫生，唔會入嚟，仲有好似三幾個覺得問題有咁大，留咗喺屋企休息。
藍：但係……下晝有成六十幾人嚟嗰喎!
母：六十三，計埋職員司機六十八。
藍：咪囉，點解得三分一有事呢？嗱，尋日都喺雅廉訪分店攪過一次，又有事？今朝至中午都有其他客人，點解人哋唔怕呢？點解淨係得呢二十人有事呢？
母：咁……咁我點知喎？
藍：咪就係囉!
P：係乜嘢呀？
藍：係未必同我哋BlueBalloon嘅食物有關囉!
母 P：吓？嗯……
藍：又疴、又嘔嘅成因有好多，喺未經證實病因之前，希望妳哋……同埋D病人……唔好同出便……特別係警方同記者……講咁多嘢。
P：藍小姐……咁……
藍：一槪答“唔知”!知嘛？記住呀!
母：咁……咁……唉!(哭泣)
P：(怒)媽!我哋走!
(二人離去，此時藍天雲的手提電話響)
藍：喂(隔一會)係!
(衹見藍天雲面色大變)咩話？(驚慌地)啊!啊!(隔一會)咁點呀？(隔一會)我即刻返嚟睇吓!(關電話)
張：咩事呀？
藍：(聲線擅抖)南灣分店門口有炸彈爆炸!
張：吓？
藍：門口玻璃同雲石炸爛晒，門口有架車都爛埋。
張：點解會咁？
藍：我返去睇吓。妳……
張：(進退兩難)我……我一陣就返嚟，我喺度等等，睇吓醫院呢度情况點先。
藍：唔!(離去)
(剩下張穎緹一人，燈熄)
(十三)a (錄影廠三區燈亮，衹見Bridget坐在椅子上，旁邊有Danny。)
(Bridget手持一叠稿，坐定之後，Danny向她示意。)
旦：可以開始啦，試一試讀D稿比我聽吖。
B：好呃。
(在Bridget講述之際，Danny可踱步，低頭)
B：星期四晚喺關前街發生嘅一宗傷人案，傷者錢國平，目前仲喺山頂醫院留醫，情况普通。根據本台記者得到嘅可靠消息，傷者懷疑係一名劫匪，據目擊嘅街坊指出，有人喺當晚十點半左右，持械搶劫一名夜歸女子嘅手袋，事主不甘損失，大呼救命，幾位街坊聞訊，合力將疑匪擒獲。
(隔一會)
一位唔願意出鏡嘅街坊證實，當晚佢有份捉住疑匪，有人極力反抗，於是佢哋幾個用木棍、竹枝同磚頭將對方打傷，並將手袋交還女事主，由於發覺疑匪已經奄奄一息，倒卧喺血泊之中，慌張之餘，就即刻四散而去。
旦：唔，幾深入喎，妳嘅消息咪仲有料到過警方喎。D報紙衹係話係一宗傷人案咋喎……喂，妳點可以查到咁多嘢嘅？
B：唔……美人計囉!
旦：哈!Nonsemse!(想了一想)
不過……除咗傳眞之外，或者仲可以將事件深化一D嘅。
B：個Story未完。
旦：GoOn!
B：另一個有份擒賊嘅靑年就話，與其將匪徒交比警察，不如自行敎訓對方一餐，因為唔想做證人、同埋上庭咁麻煩喎，佢承認當佢哋打個劫匪嘅時候，多少都有發洩嘅成份。
旦：等等!發洩？唔!係咪同嗰區最近發生過比較嚴重嘅劫案有關呢？於是呢個殺傷力有限嘅劫匪就激起公憤嘞。
B：(笑)唉!Danny，我點可以唔崇拜你吖？你D觸覺好敏銳呀。
旦：妳都係咁稔？
B：差唔多啦，所以我先至去搵咗一位心理學家啫!
旦：咁就證明妳嘅觸覺都唔錯喇!
B：睇片喇!
(燈區熄，熒幕播出片斷)
心理學家：發生呢件事嘅原因，我相信係由於近期有人多次散播一D言論，對警方加以抨擊，因而影響咗市民對警隊嘅信心。
另一點係，個女人被劫嘅地方，好接近日前被人持械行劫嘅草堆街天盛金舖。當日匪徒嘅猖狂行為已經對D街坊心理造成影響，人人提高警覺，一旦目擊罪案發生，就好憤怒，旣然強弱立見，咪一時衝動，用私刑嚟對付罪犯，結果咪打傷個劫匪囉!
(CutOut)
旦：(鼓掌)well－Done!好吖!補充一句，由此可見傳媒嘅報導對受衆影響力之大——嗯……我係指源仲標批評警方嘅言論呀。
B：係嘅!
(用筆記下)
B：仲有呀!
旦：啊。
B：濫用私刑係絕對不適宜嘅，未必人人可以準確咁判斷是非對錯，所以路見不平拔刀相助係要睇情况，實在不能盲目鼓吹“行俠仗義作風”。
(停一停)
來自監獄嘅消息，有關方面已經證實咗，上星期因交通意外之後用雨遮插傷人嘅十七歲靑年曾狄祺，日前被其他囚犯打傷。
據講，呢件血案亦無報復成份，祇係由於近期曾狄祺被吹捧為“少年英雄”，因而引起其他囚犯不滿。
我哋亦都同警方接觸過，根據佢哋表示，到目前為止，未有足夠證據證明曾狄祺係“抱打不平”而將私家車司機陳桂添插傷嘅。曾經一度為曾狄祺發起簽名運動嘅地產商人源仲標又有乜嘢表示呢？
(燈光轉暗，螢光幕出現源仲標，旁有衆記者)
B：(在錄影帶上的聲音)對於呢點你有乜嘢感想呢？
源：我唔係太淸楚實際情况，如果曾狄祺眞係遇襲受傷，我會覺得好遺憾。(停一停)
警方一定要徹查呢件事，係……責無旁貸嘅，佢哋!
嗱，凡係有罪案一定要查到底，盡力偵破，咁樣對市民先至有交代嘛!我哋至可以安居樂業。
B：請問你會唔會有其他嘅進一步行動呢？除咗請願。
源：嗯……考慮緊。呢，好似尋晚藍氣球快餐店嘅爆炸案就係喇!咁樣實搞到人唔敢出街啫!時時有爆炸，點掂呀？
B：你估計事件同之前嘅爆炸案有有關連呢？
源：我稔唔同麥當奴呀、翠園嘅炸彈案：因為我同嗰間快餐店呢幾日搞緊一項推廣活動，佢哋招待嘉賓，我就贊助紀念品。點知尋日有十幾個婦女同老人家之後覺得唔舒服，懷疑中毒。
B：你覺得兩件事有關連？
源：俾人整蠱啩!目標可能係我，或者快餐店。
B：事前你哋有冇收到恐嚇信呢？
源：冇。冇冇!
(Cut Off)
B：(向觀衆)藍氣球快餐店中毒事件，根據市政廳嘅化驗，初步懷疑係由於碎牛肉有細菌所致。而至於爆炸案，警方就懷疑匪徒目標係嗰架車，據講車主係一間地下錢莊嘅老板，警方對事件正展開深入調查。
旦：OK!好吖!幾好呃。Bridget，希望妳可以回復信心，愈做愈好。
B：多謝。Danny……
旦：嗯……？
B：我呢幾日稔通咗，覺得呢度眞係好需要有一D人，將事實嘅眞相公開話比市民知。
旦：妳願意同我哋一齊擔當呢項任務？
B：係!
(Danny與Bridget握手)
(十四) (唐景輝與手持Video－Cam的Walkman出現在台左平台上，後面有Pionia及其母隨之，Iasbel亦在場。)
唐：就呢個位喇!(指揮WalkmanSet機)
Walkman你喺呢邊喇。
(向母女二人)你哋企呢邊得啦!
P、母：啊!(二人站好)
唐：開始囉喎，照頭先試嗰時咁答就得嘞!
陳太妳不妨表现得閉翳D……可以，妳可以話係受害人嚟嘛!(Isabel望了Walkman一眼)好!(定一定神)
唐：(向“鏡頭”)懐疑食咗不潔食物嘅一班社區中心成員，其中尙有九人仍留院觀察，大致情况普通，兩人情况欠佳。
出事嘅快餐店近日安排咗多批人士免费享用其提供嘅食物，涉及嘅社區中心，係透過快餐店其中一位職員陳小姐安排嘅，因爲佢嘅媽媽，正係社區中心嘅職員。
(向母女二人)
陳太呀，當初係咪妳決定接受邀請嘅呢？
母：係……咁我個女喺嗰度做吖嘛!
P：係我負責聯絡嘅……
母：稔住又唔駛錢，仲話有禮物收，咁等D會員試吓D乜嘢“美國快餐”都好吖!唉，點知會攪成咁喎？
唐：D病人同埋佢哋嘅家人有乜嘢反應呢？
母：唉!冇乜點嘅，咪話唔好彩囉!但係有D都好唔高興呀，仲埋怨埋我D!
P：其實邊關我阿媽事啫？
母：最衰係我乜事都冇噃，我寜願同佢哋一齊有事我仲安樂D!
(哭泣)
P：媽!(拍拍她的媽)
唐：其他分店都有攪呢D活動，有冇聽聞發生同類意外呢？
P：冇。其他嘅乜事都冇。
唐：D食品係咪由同一工埸生産嘅呢？
P：原料由同一地方供應，然後由各餐廳自己製造生産。
唐：我又想問吓陳太，快餐店方面有乜處理工作呢？譬如話賠償呀咁，有冇同你哋傾過呢？
母：(搖頭)有，乜都冇!仲叫我哋唔好立亂同出便講，好似係我哋自己攞嚟嘅咁。
唐：點解呢？
母：有人驚蝕底囉，搏命食囉，或者食得過量都未定，有人打包，或者係令到D肉變壞啩……唉，總之我比佢哋害死喇，夾喺中間……(哭)玩吓手份工都冇埋……。
唐：(向Pionia)陳小姐，公司方面有乜嘢打算呢？
P：公司令我好失望，我會追究到底!我打算唔做嘞，不過我會等事件眞相大白為止……因為我覺得佢哋好不負責任囉!佢哋衹顧住公司個名!我預咗佢哋炒啦!
唐：最後我想知道，點解會有禮品派嘅呢？
母：我唔知。
唐：係咩嚟？
母：日用品囉!
P：係源生贊助嗰喎，話係敬老同埋唔知乜嘢喎，總之係名目多多咁囉!
母：仲有抽獎呀，但係就人人有份嘅。
唐：啊!好啦，唔該晒!
門：好，Cut咗。
唐：(向母女二人)唔該晒兩位!
母、P：唔駛。
唐：走得啦!唔該晒!再見!
母、P：再見。
(Pionia及母親離去)
唐：源仲標嘅企圖，好明顯喇!
I：係呀。
唐：好啦，Walkman，補返一D“反應Shot”喇，你喺嗰邊影我啦。
門：啊!
(Walkman換了方向，開始拍，不久唐景輝摘下眼鏡，輕拭眼部，Walkman立刻停機。)
唐：喂，做乜Cut呀？
門：Ng吖嘛!有沙入眼呀？
唐：我未叫Cut你咪自己Cut喇!
門：邊有咁嘅“反應Shot”嘅啫？平時你咪點吓頭咁嘅啫!邊會
唐：個女人可憐吖嘛!繼續。
(Walkman沒反應)
唐：Walkman!
門：對唔住!(搖頭)我稔咁唔係幾好!我哋係做新聞!唔係煽情!
唐：Walkman!
門：對唔住!
唐：(靜止一會)好，走!(離去)
(燈熄)
(十五) (台右辦公室之區燈亮，VICTORIa內進，目光四盼，隨之入內的是Danny。)
旦：我哋嘅辦公室就係呢度。(遙指)嗰度有樓梯可以落去我哋一個細嘅專用Studio。
張：你Office呢？
旦：喺隔離。不過擺咗好多女人相喺度，無謂參觀嘞!
張：以退為進呀？
旦：好嘞，喺邊度傾呀？
張：就呢度喇，唔通喺隔離咩？我唔想嗰D女人以為我都係嗰D女人。
旦：嗰D女人係唔會嚟我Office嘅!所以妳都一定唔係嗰D女人。
張：我嘅幽默感已經消失咗嘞。
旦：咁不妨開門見山講吖，Victoria，妳搵到嚟……一定有事嘅。
(說此話時一邊去倒水)
張：係嘅，係有事。
旦：公事？定私事呀？
張：私事？唔會啩？(Danny把水放在Victoria面前)唔該。
旦：唔駛。我稔妳唔會堅決要求要Capuccino啩？
張：(笑)我識得視乎情况嘅……。適當嘅環境，做適當嘅嘢。
旦：呢句說話……好似係妳提示離婚嘅時候講過嗰喎……
(Victoria瞪起眼望着Danny，頗為不悅)
旦：OK，公事。
(兩人靜默了片刻)
張：喺適當嘅環境、適當嘅時候，應該去做適當嘅嘢。澳門有好多事値得你哋關心嘅，何必咁單調，經常集中講源仲標，講Blue Balloon啫？
(Danny有點愕然)
旦：妳係以乜嘢身分嚟同我講？
張：就當我係一個觀衆，普通嘅電視觀衆啦，對《壹線傳眞》表達一D意見，可唔可以吖？
旦：歡迎之至喇!我哋開放渠道，廣納意見嘅。(頓一頓)
不過，我覺得我哋冇成日提源仲標吖，我反而時時警覺，盡量唔好比一D人曝光過多。老實同妳講吖，有D關於源生嘅新聞，我哋都Drop咗喇，係我提出叫D同事唔再做落去嘅。
張：太多偏向負面嘅報導，會唔會令人覺得你哋喺度針對一個人呀？
旦：Victoria，妳話妳係用“普通觀衆”嘅身分同我講，如果衹係普通觀衆，就唔會覺得有乜嘢。星期六嘅節目當中我哋有幾個古仔，其中一節涉及BlueBalloon，而源生嘅訪問，係得一段啫。
張：但係你哋間接批評咗人哋喎!Danny，凡事要適可而止，太深入追究反而會自討苦吃。
旦：我好驚奇妳會同我咁講，亦好奇怪點解唔係源生直接嚟同我哋反映。
張：(想了一想)因為我哋仲算係朋友。
旦：D人一睇到唔啱心水嘅報導就施加壓力……嘿!如果認為報導失實嘅，就應該提出證據，否則就係侵犯言論自由!
(兩人靜止，Victoria不知如何說下去)
旦：中毒事件爆炸事件暴風少年事件，我哋查明咗就要向市民交代，我哋呢度冇“比面”呢回事，亦都唔會容忍一D混淆視聽嘅言論嘅!
張：Danny，你以為自己係無冕皇帝呀？
旦：(搶接)a!我最討厭人哋形容記者係“無冕皇帝”嘅!
張：Danny呀!你鬥佢哋唔過!我……就當你係朋友先至咁講咋!源仲標呢個人……乜都可以做。
旦：唔通妳驚BlueBalloon嘅業務會因為我哋嘅報導而受影響？間接影響咗妳嘅事業？
張：(怒)Danny!我為你好咋!
(一怒而去)
旦：Victoria!Victoria!(Victoria頭也不回)
唉!(覺察門外有人)邊個？
(不久，門外出現了唐景輝，他站定了之後，望望Danny，便內進。)
唐：唔好意思喎，啱啱……(指指門口)
旦：啊，公事啫。
唐：呢個“至叻星”，居然直頭殺上嚟呵!
旦：嘿!
唐：佢係出名嘅才女，但係呢次似乎又……嗯……(望望Danny)我頭先……嗯……或者你哋有閂門啩……
旦：佢冇錯係好叻，叻在唔輸得，人如其名，Victoria。
唐：蝦……，點解佢由美國返香港，又喺香港過嚟澳門呢？
旦：咁先至可以有一個“打晒骰”嘅機會吖嘛。
唐：Danny，咁淸楚嘅？
旦：(望一望唐，冷笑一聲)嘿!……我前妻嚟。
唐：(詫異)吓？
(想了一想)咁……佢頭先嚟……算係……嗯……(待Danny 答)
旦：算係，叫我哋放過源仲標，放過BlueBalloon啩。
唐：Danny，唔好怪我坦白，有時我眞係無所適從，我哋跟巴士佬
Benz佬單Case，就被你Drop咗，但係對於中毒事件、爆炸案你又比Bridget做。
旦：阿輝你唔好誤會，你哋跟Benz佬Vs巴士佬個古仔嘅時候，我反對嘅係你哋採訪手法，對於源仲標嘅言論我都係唔同意。
唐：呢D人嗡得就嗡，咪要批評囉!我注意嘅係結果，採訪程序大可不理，何况觀衆亦睇唔到!
旦：我追求嘅係一次完美嘅採訪、完整嘅報導!呢，源仲標喺講到中毒、爆炸嘅時候，簡直係顚倒黑白，我哋當然要講出我哋採訪到嘅事實喇!
(走近唐)
輝，我睇得出你可能對源仲標呢類人有D成見，但係我睇做新聞應該減低個人嘅主觀情感嘅。
(唐景輝依然心有不忿似的，燈熄。)
(十六)(台左演區燈亮，衹見藍天雲坐在沙發上，源仲標則在踱步，兩人皆滿懷心事。)
源：今次競選我唔可以輸!我脫離地產商會，自己出嚟選，佢哋已經唔多高興，如果今次衰咗，我嘅聲譽同地位都會有好大影響。
藍：我一定全力支持你嘅，放心喇!錢唔係問題，人才方面，我哋睇吓Victoria點先喇!
源：呢屆立法會選舉，太多人爭嘞!錢同人才都係眞正嘅力量所在，不過策略都好緊要。我地而家嘅處境唔係咁好，一定要搞番掂佢!
藍：我間快餐店夠係喇!一單中毒，生意額下降咗六成，唉!(搖頭)
如果你當選，九九之後都唔駛變。喂!你到時一定要攪掂廣州同佛山嗰便呀!藍氣球要開上大陸至有作為嘛!
源：放心喇!大陸嗰邊唔會有問題，不過，我一定要多D政治本錢至得!哼!我喺澳門反而好多嘢控制唔到。(頓一頓)
D記者……好難攪!
(此時Victoria出現)
張：藍小姐!咦？源生有出公司咩？
源：有!特登等妳嚟嘛!有嘢同妳商量呀!想挖角呀!
張：源生眞係識講笑!(向藍)點解要嚟妳屋企開會嘅？
藍：因為唔係淨係講公事……喺呢度傾會方便D。
源：張小姐，我快人快事，我講先。嗱，妳知我已經遞咗表，要競選今屆立法議員啦，我想搵妳幫手。
張：乜話？源生，妳嘅意思係……
源：加入我嘅助選團。
張：助選？我完全有經驗嗰喎，講眞吖，最近兩三次澳門立法會選舉我都唔喺澳門。我對競選情况實在好唔了解。
源：張小姐，邊個唔知妳係“至叻星”吖？
張：車，呢D虛名!
藍：Victoria，妳幫吓源生喇!酬勞方面……妳可以放心!
張：源生應該早有助選嘅班底，何必——
源：(搶接)張小姐!係，本來唔想麻煩妳，但係妳知喇，近日發生咁多事，對我有D不利，都未開始宣傳啫，形勢已經比較險峻嘞，我冇辦法唔再招兵買馬，搵多D人才幫手。
藍：冇錯嘞!尤其而家輿論對源生唔係幾好，我哋想妳都幫埋手。
張：藍小姐，源生!……
藍：妳可以考慮一下先嘅。
張：我想講……第一，我對政治冇興趣。
源：唔係叫妳搞政治，係叫妳“度橋”，因為妳有豐富嘅行政經驗，妳可以喺整體部署方面提供意見。
張：(隔了一會)第二，我冇太多時間，我驚分配唔到時間，兼顧唔到快餐店。
藍：快餐店我可以搵人幫妳，妳可以隨時外出，去幫源生。我講過喇，酬勞一定令妳滿意。
源：係，呢次競選，我衹許成功，不許失敗。
張：第三，我嘅興趣係做快餐店。尤其近日BlueBalloon發生咗一D不利事件，我更加要將佢攪好，我唔想分心做其他嘢。
(三人靜止)
藍：Victoria妳考慮吓先喇，或者我哋傾第二個問題先。
張：唔駛考——
源：(截住說話)a!聽埋先至講喇!
藍：社區中心班人集體中毒事件，我哋要搵個人孭鍋，希望咁可以挽回聲譽。
源：我話係比人整蠱嘅，已經被人踢爆咗，所以要搵個理由，等我都易落台D吖。
張：我哋咪話“作內部處分”囉!
藍：我稔住炒咗林天生!
張：炒咗佢？
藍：廚房係佢負責嘛!
張：但係呢次好明顯係兩個女工疏忽喎，我哋已經懲罰咗佢哋喇!
藍：不過林天生係阿頭喎，炒佢好啱吖，我哋仲要搞大佢，顯示出BlueBalloon改善服務嘅決心。
張：雖然呢件事係林天生應該負D責任嘅，但係為咗形象而犧牲一個得力嘅助手，我認為得不嘗失，何况林天生眞正喺過香港SackInTheBox打過骰，佢對BlueBalloon好有幫助。
藍：喂，嗰個Pionia咪話炒我哋魷魚嘅？一不做二不休，對出便話：(鄭重地)“有人引咎辭職”。
張：(大聲地)咁點得？
源：唔指明道姓咪得囉!佢咬呀？為保江山，就要無所不用其技!
(Victoria為之氣結)
藍：為咗挽回D客，我哋要大力谷廣告!報紙電台、電視台都要大做特做!
源：壹線電視台例外呀!
藍：仲要中止佢哋嘅廣告，至月尾就唔續播!
張：點解呀？
源：因為嗰個《壹線傳眞》對我對藍氣球都有D不利嘅報導!
張：你她想用中止廣告嚟打擊壹線電視台？
藍：少佢哋一間唔緊要啫，澳門仲有其他宣傳途徑嘅。
張：佢哋少一個廣告客戶影響唔會好大啫，因為佢哋其中一個收入嘅途徑，係來自用戶吖嘛。我稔……咁做有乜效益啫。
源：張小姐，妳有所不知!因為我哋好唔滿意《壹線傳眞》，好唔妥嗰個姓俞嘅。
張：你想點？
源：我想呢個節目停播，我想呢個嘢冇得撈!我已經起咗俞廷之嘅底嘞!
張：有咩底呀？(緊張地)
藍：咪女人囉!有個女人成日纏住佢嘛!咪係嗰晚我哋喺Blue Balloon門口見過嗰個囉!聽講佢呢輪都好煩!
張：你哋點知？
源：有D行家視佢哋為眼中釘，衹要我略施小技，D人乜都爆喇!
藍：如果佢嘅私生活有問題，佢嘅形象必然受損!
源：再唔係，唔駛咁麻煩喇，速戰速決，咪搵兩條友斬佢隻手落嚟囉!
張：(緊張地)唔好呀!
源：唔好？哼!澳門街，最主要都係互相比面啫，你唔比面我，我做乜要比面你呀？我行出去個個記者朋友都比面我，係一個乜嘢《臺線傳眞》唔識做，我要搞掂佢，唔難吖。
張：源生，我希望你稔淸楚。
源：咩呀？
張：澳門係法治社會。
源：但係唔可以立亂批評人。
張：不過呢度有新聞自由，言論自由喎!
源：做乜妳係都幫住佢？
張：我……我係為咗正義……。我衹係想做好BlueBalloon啫，其他嘅嘢……
源：其他嘅嘢……妳就唔好插手喇!我一陣已經約咗嗰個女人……咩話？(站起來，拿起手袋)
藍：Racial呀!
源：冇錯，威曹。
張：源生……
藍：係咪因為妳係嗰個兪廷之嘅朋友？
(張望二人)
張：佢係我前夫。
藍、源：吓？ (燈熄)
(十七) (辦公室區亮燈，唐景輝在踱步，Bridget、Isabel及Walkman則坐着，氣氛沉重。)
I：Walkman，咁耐嘅？(看錶)
門：點知呀？
I：Danny忽然間話召開緊急會議，自己又遲到。
門：(指向守則)“耐性永遠都會為妳帶來驚喜。”
等吓喇!
(又歸於沉寂)
B：輝哥!(唐停步)
你尋晚同我講嘅……係眞嘅？
唐：外便係咁傳。
I：傳乜嘢呀？
B：話阿Danny——
(Danny沮喪地內進)
旦：早晨!
衆：早晨Danny!
(一片死寂)
旦：如果有一日，澳門冇咗《壹線傳眞》……(續說，不停)
(衆愕然)
市民可能冇乜嘢特別感覺，或者衹係得我哋幾個覺得係一個Shock。
門：Danny，唔……唔係吖嘛？眞係……嗯……
旦：我話如果啫。
衆：啊……(緩和了一下)
B：Danny，唔係眞係有危機吖嘛？
旦：如果而家有咗呢個節目，將來好難再會有，九九年之後更加唔會有。
門：咁係咪眞係有可能有困難呢？
旦：人生根本就係經常要面對困難，經常都要去解決好多困難喇。我哋老細麥生都面對住一D疑難，承受一D壓力。
輝：Danny，你嘅意思係指……
旦：有D廣告客戶將會唔續約，其中包括BlueBalloon，其他嘅，相信都會同藍天雲、源仲標有關，或者係佢哋DFriend啩。
I：點解會咁？
旦：來自側面嘅消息話，佢哋對《壹線傳眞》內容唔滿意。仲有係……針對我囉，因為我係阿Head吖嘛。
B：傳媒通常都唔會作太嚴厲嘅批評嘅，怕得失D廣告客戶吖嘛，冇錯，《壹線傳眞》係的確反其道而行嘅，點知，終於都受到呢種威脅。
輝：我哋係CableTV喎，廣告衹不過係收入來源之一啫？我哋駛乜咁驚靑啫？Danny，你打算點？
旦：大家有乜嘢意見？
輝：我覺得我哋已經駡得唔夠應嘞!我哋唔應該畏首畏尾，反而更加要對事件作“大踢爆”!
門：咁樣會唔會走咗去D“忽周凸周”路線呀？
輝：當然唔會衹顧刺激官能喇。
B：咁可能會有D嘩衆取寵成分嗰喎!
輝：我尋晚都同妳講過啦，係“引起觀衆嘅興趣”!資訊娛樂化係一個趨勢嚟嘅。
門：Danny同過我哋講過好多次，我哋唔係“追擊”唔係“睇眞D”
喎。(各人望着Danny，Danny略加思索)
旦：我認為我哋要堅持“傳眞”，而唔一定要顧及嗰個Story係咪吸引大部分嘅觀衆。譬如話，一個疑匪被捕嘅時候，可能被所有傳媒大事報導，但係如果佢係無辜嘅，到佢沉冤得雪嘅時候，有D傳媒可能衹會馬虎了事，係咁意報導吓就算，咁對佢係唔公平嘅。
B：所以我哋對呢D消息都會詳加報導，係咪？
旦：唔。
輝：咁同我嘅稔法相差好遠。
B：希望你(向Danny)會留喺度，我會支持你。
輝：Bridget!
門：我都會。
I：(點頭)唔!
輝：但係而家上頭有意思想我哋變喎。
B：如果我哋覺得自己冇錯嘅就可以堅持落去。
旦：有錯。源仲標認為我哋針對佢，係佢嘅個人睇法啫，我唔希望有D人借助咗傳媒嘅力量，去講一D混淆視聽嘅說話，咁樣簡直係對新聞傳播專業嘅一種侮辱。(頓一頓)
如果我哋咁樣都被人話嘅，阿輝你想用更強烈嘅風格去做，咪更加行唔通？
輝：故此唯一自保之道咪係改變路線囉。
旦：咁咪失咗《壹線傳眞》嘅原意？
輝：而家有人想整“冧”，整“冧”《壹線傳眞》吖嘛!聽講有人想開記者會，澄淸一切同爆大鑊喎，反咬我哋製造假消息呀!
門、I、B：咩話？吓？
(各人怔住，燈熄)
(十八) (LaDéense餐廳內)
(Victoria坐着喝咖啡，Racial內進)
張：請坐。
(Racial未有坐下，站着跟Victoria說話。)
R：我哋會有乜嘢共同話題呢？
張：有!絕對有。
R：OK，我嘅RacialBoutique，同你嘅BlueBalloon快餐店，用乜嘢“Nang”埋一齊呢？唔……或者……
張：Racial，坐低先喇。
R：(想了一想)好。又係LaDéense？
(侍應出現)
R：TonicWater唔該。
侍：係(離場)
張：我想同妳講……講……Danny嘅事。
R：(臉色一沉)妳同佢離咗婚好多年喇，大槪你哋都冇乜嘢Na Nang啦啩？相信佢都唔會過問妳嘅嘢啩？
張：係!我知，但係……我哋都仲算係朋友吖。
嗱，首先我唔理妳同佢發生咗乜嘢事，我亦唔知妳對佢嘅態度係點……不過……
R：點呀？
張：不過我唔想佢受到傷害，尤其係用D不正當嘅手法傷害佢。
R：妳咁講係咩意思？妳似乎係度暗示緊D乜嘢咁喎。
(侍應送上TonicWater)
張：因為我知道有人要對付佢，呢個人仲想搵埋妳——或者話係……係利用妳去打擊Danny。
R：利用？我冇咁易被人利用啩？我做嘅嘢……都會係我主動做嘅。
張：或者我直接D問喇……源仲標有有搵過妳？
(Racial一怔，沒答)
張：Racial，我話想對付佢嗰個人係佢呀!
(頓一頓)
佢同我講過，佢會同其他人聯成一線，Cut mCTV嘅廣告，又想開記者會，指責Danny佢哋製造新聞，最過份嘅係想搵人斬咗佢隻手落嚟。
R：咩話？(大驚)
張：佢提過，想搵妳出嚟，去證明Danny私生活不檢點喎……大槪係咁喇，詳細我唔知佢會點同妳講。
(兩人靜止)
張：咁到底佢有冇搵過妳吖？
R：有。
張：佢眞係咁同妳講？佢要求妳幫佢呀？
R：呢個大陸佬眞係簡單得可愛，我會唔會“Where”爛塊面去篤爆Danny呀？
就算我點恨Danny，係我嘅事啫，呢D係私人嘢，我又點會拉埋自己落水啫？
張：(隔一會)咁我都放心D。
(又隔一會)妳同Danny……嗯……妳放心，我講過我哋已經冇關係嘞。
R：我同Danny？有嘢吖。
張：我同Danny結婚前，冇錯妳哋係拍過拖，冇相干嘅……我同佢又分開咗咯，更加冇權干涉你哋喇。(頓了一會兒)
我衹係唔希望見到Danny有事咋!妳知喇，源仲標呢D咁嘅人，乜都做得出嘛。
R：妳唔係喺Blue Balloon做嘅咩？藍天雲同佢……
張：(搖頭)佢哋D咁嘅作風……(沒說下去)
唉!我相信我唔會留喺度好耐。(呷一口咖啡，凝望遠處)
R：我都離咗婚。
張：係咩？
R：前年。舊年遇番Danny，我哋都算再行埋過嘅，不過呢幾個月，佢又同我疏遠咗。
張：佢又有第二個？
R：我睇唔係嘅……祇係，佢愈嚟愈對工作狂熱啩。我最嬲嘅係，有一次佢問我，“妳係咪要錢吖”，咁喎，當我係咩呀？
張：佢仲有冇花天酒地呀？
R：都有同DYuppies一齊嘅……。女人就或者冇嘞……不過，佢同妳離咗婚，妳離開咗澳門之後嗰一兩天，佢就放縱得好厲害，聽講好多“一夜情”
!
張：Danny係一個唔適合結婚嘅男人。
R：以過來人身分警告我呀？
張：(冷笑一聲)嘿!我唔可以左右妳嘅睇法嘅。
(兩人靜止)
R：好啦!講番源仲標吖。
張：OK!
R：佢想
日下晝招待記者，想叫埋我去。
張：咁快？(猛然醒起)唔怪得藍天雲話日好忙啦!
R：點呀？先發制人？
張：靜觀其變!佢會指責mCTV捏造新聞嘅，mCTV實有反應，我哋應該透過mCTV，去逐一擊破!
R：我會應承佢出席，然後……
(燈熄)
(十九) (錄影廠燈亮，此乃一區燈，照着坐着的Bridget)
B：日前《壹線傳眞》呢個節目受到某D人士嘅一D指責，對於嗰
D不負責任嘅說話，本節目認為有澄淸嘅必要。(停了片刻)藍氣球快餐店嘅集體中毒事件，衛生司同市政廳已經證實咗本節目嘅報導係確實無誤嘅，事件嘅餘波係有人指當日嘅賓客當中有人“打包”同過量進食，有關嘅社區中心一位工作人員陳大澄淸，實際並無此事。
(另一小燈區亮，陳太——Pionia之母進入燈區)
母：好彩我哋十幾二十個食物中毒嘅會員而家都有乜事嘞，不過，佢哋都話，嗰日冇食得大多，最多嗰D都係食咗兩個包啫。
有人喺記者招待會話我哋有人食四、五個包，邊有咁嘅事啫？你估我哋喺監倉放出嚟咩？以為我哋前世未食過漢堡飽咩？話我哋打包喎，係!係有人打包，都衹不過係想攞比其他有去嘅嗰D會員啫，咁啱食咗嘅亦冇事呃，證明唔係D肉類放耐咗變壞喇!政府都話係D大腸乜嘢菌作怪啫。唔得咁樣賴咗我哋D會員嘛!
(燈熄，Bridget燈區重亮)
B：不過最無辜嘅係藍氣球快餐店嘅一位女職員Pionia佢亦即係剛才嗰位陳大嘅女，佢被人話係“引咎辭識”喎。
聽吓佢點解釋。
(另一小燈區亮，Pionia在燈區中)
P：我係辭咗職，係因為對公司不滿而唔做嘅，因為佢哋處理中毒事件嘅態度好差囉。件事同我媽咪做嘢嗰度有關嘛!梗係勞氣喇。
但係話我“引咎辭職”喎，我就更加激氣嘞!意外發生喺南灣分店，我都唔係喺嗰間分店度做嘅，件事同我冇關嘅，有乜嘢“內疚”啫？點會“引咎辭職”呀？
D報紙好似聽到人講乜就寫乜咁，都唔去查淸楚問淸楚嘅。佢哋有錢可以開記者招待會，於是就嗡乜都得喇，而我哋D小市民就冇渠道去表白喎，好唔公平啫。
(燈區轉)
B：事實上，我哋都一直希望可以“傳眞”，保障市民嘅知情權，並且提供機會比當事人講出眞相嘅。
大家仲記唔記得用雨遮插傷人嘅少年曾狄祺呢？原來，當日同佢一齊嘅仲有一位少女吳嘉綸，而佢正係藍氣球快餐店嘅女少東喎，聽吓佢點講吖。
(燈區轉)
嘉：嗰日曾狄祺的確係為咗喺我面前……“懶”勇敢咁囉……。
係有人敎我車大炮，話曾狄祺抱打不平喳!當時我見到嗰個私家車司機滿面血，心口又猛標血，以為佢死梗添……
人哋咁敎我講，我以為可以令呢單嘢唔當係謀殺，咪跟佢敎我咁講囉。
後來我已經知道咗……比假口供會犯刑事罪，我已經同咗警察講啦!點知，嗰日源仲標開乜嘢記者會，仲挖返出嚟講喎。
呢，係佢敎我比假口供，後來我先至知道，原來佢亦都同曾狄祺秘密接觸過，夾咗我同佢嘅口供……。佢根本係有一套陰謀嘅，害到我成日比差佬窒比差佬媽!
(燈區轉)
B：對於呢件事以前我哋已經報導過，旣然有人喺記者會仍然企圖捏造事實，我哋唯有等吳嘉綸Coric現身說法嘞。
另外，最近有人散播謠言，影響到我哋嘅同事俞廷之嘅個人形象。喺嗰個記者會裡便，當初有人提過會有一個緋聞中嘅主角出現。但係最初呢個冇現身，佢就係Racial Kuan嘞。
(區燈又再改變，Racial出現)
R：我覺得近期D傳聞好無稽。
係，我以前同俞廷之拍過拖，不過係我讀中學時候嘅嘢喇。大槪再“抄”番出嚟講已經冇乜價値嘞。咁……我同Danny都仲係朋友嚟嘅……不過已經冇乜來往喇……
早排有人問起我係咪Danny玩弄感情喎，呢D係無中生有嘅問題，無聊到極。有人想收買我，叫我出席乜嘢招待會，爆內幕喎，哼!我唔係一個編劇家，我唔會為咗金錢利益而作古仔嘅。
(燈區轉)
B：誰是誰非，已經好明顯，稍有分析能力嘅都應該知道有D人係別有用心嘅。
傳播媒介被認為係極具影響力嘅，所以我哋要求報導要客觀，監察社會，盡力挖掘眞相嘅責任。
如果我哋節目內容有偏頗或者誤失，亦歡迎觀衆向我哋多提意見嘅。
再會。
(區熄，整個燈區亮)
(Victoria出現，向Racial握手)
張：唔該晒妳，Racial。
R：唔駛，希望幫到Danny啦!
(Pionia及其母，Coric等亦步出)
B：唔該咁多位!
(Walkman與Isabel出來，Isabel拉着Coric
I：妳媽咪會好嬲……
嘉：唔知……(聳聳肩)
(Danny最後出現)
旦：(望各人)傳眞……(冷笑)嘿!
(燈熄)
(尾聲)(燈區亮，Isabel步入燈區，向歡衆說話)
I：(語氣沉重)呢一輪，辦公室嘅氣氛好沉重……雖然一切好似暫時靜咗落嚟，不過，好難講聽日，或者一陣會有乜嘢事發生。
Blue Balloon繼續開門營業，但係生意已經唔係咁好。哈!澳門人好善忘嘅，可能下個月又會旺番囉!不過呢，Victoria就會走嘞!Bridget叫佢嚟macCable TV做喎!我就建議佢開一間壽司快餐店，可以Take away嘅，唔駛喺門口排隊咁贛居喇!
嗰個暴風少年曾狄祺單案件未審，不過我睇佢幾難甩身嘞。(頓一頓)Coric好失落，同佢媽咪關係更差!我都有成日去搵佢，好似做社工咁，所以Bridget讚我呀!話我唔“十”啦!
(停一停)
呢，唐景輝稔住會離開壹線電視台喎!至於Danny其實都好唔開心，佢強調傳眞，但係Racial嘅“眞話”，竟然又可以幫到佢喎。你哋話諷唔諷刺吖？
a，我哋應該相信傳媒嘅說話幾多Percent呢呵？Danny話過，治安差，會脅威到人身安全；傳媒質素唔好，就會對我哋嘅思想同意識有壞嘅影響。佢仲話，資訊有時會變咗做“無形殺手”咁話喎，你哋覺得呢？
(停一停)
呀!行政曁公職司剛啱公布咗今次立法會選舉嘅候選人名單，我而家要去Check過有冇源仲標個名。
a，九月廿二號係立法會選舉呀，到時記得去投票呀!(揮手)
(完)
*该劇公演時，署名編劇爲“劉傑三”，即王智豪。