灰姑娘之非常結局篇
譚淑霞
第一場：非常獨白
時間：中世紀
地點：曠野
人物：灰姑娘
(幕啓：一段哀怨的音樂過後，聚燈緩緩亮起，照着舞台右方，一名穿着宮廷服飾的少婦，正從舞台右側步進燈區內)
灰：喺童話世界裡面，每一個故事都係大團圓結局嘅!王子同公主，一定可以過住幸福美滿嘅生活，白頭到老，點解？點解喺我嘅童話裡面，要安排我做一個平平凡凡嘅灰姑娘，而唔係一個尊貴美麗嘅公主呢？好多人都以為灰姑娘同王子結婚之後，梗係過住幸福美滿嘅生活，但係，又有邊個估到，一入宮門深似海，一個平民百姓，要學習宮廷禮儀，做一個受人尊敬嘅皇后，樣樣事要依足宮廷規矩，偶然行錯一步，就立刻俾人鬧，話我唔識規矩，有一D妒忌我嘅，更加踩多我兩腳，話我爛泥扶唔上壁，配唔起王子。初時，王子都唔當喺一回事
!仲安慰我，話我唔駛理D閒言閒語喎!嗰陣時，我哋眞係過過一D幸福美滿嘅生活!不過，我知道衹有愛情，係唔可以維繫一世嘅婚姻嘅，其實，我已經好努力咁去做一個貴族啦!
但係，呢一個始終唔係我，衹係一個任人擺佈嘅公仔，雖然我得到咗王子，但係我失去咗自己，我生活得好唔開心，我好憎恨自己，點解我唔係出生於富貴人家？點解我唔係貴族？如果我係上流社會嘅人，我就唔會咁痛苦，(激動地)我好驚，我驚我配唔起王子，尤其是當我人老珠黃嘅時候，王子會討厭我，拋棄我，我眞係好驚呀……!(陰沉地)我決定，我決定喺王子討厭我、拋棄我之前，離開佢，我要喺佢心目中，留下最好嘅印象。我仲有一個願望，就係喺我死咗之後，下世投胎我要做一個貴族，一個眞眞正正襯得起王子嘅貴族。親愛嘅王子，請你等我，我一定會成為一個眞正嘅貴族，一個尊貴美麗嘅公主，王子，你要等我，你要等我呀……!
(伏在舞台上，自殺而死，聚燈漸暗，幕下)
第二場：非常學校
時間：未來
地點：伶仃島上的非常學校
人物：少女一族(紅杏、桃薇、銀柳、小星)
精靈一族(小精靈、鬼精靈、閃精靈、亮精靈)
掃地八嬸、白老師、亞擦、書呆、悲灰姑娘、萬寶寶、水牛、IQ 博士、灰姑娘、魯老師、杜莫奴
(幕仍閉，悲灰姑娘從舞台左側門入，朝着舞台方向，一邊行，一邊說)
悲：唉!返學眞係慘!(走至舞台上)唉!讀書眞係慘!(走至幕前，面向幕，背向觀衆，拿着一張零分的則驗卷)唉!(再轉身向觀衆)測驗零分眞係慘呀!(書呆從舞台左側門入，一邊看書一邊上舞台)你哋話呀!生存喺呢個世界上面，有乜嘢意義吖？不如……。
呆：讀書!我要讀書!我要努力讀書!
悲：唉!書呆，乜你又喺度喊口號啦!
呆：每日喊一喊口號，精神百倍有疲勞，讀書醒神……醒神，弊嘞!對唔到落去添!唔得，功力唔夠，要繼續刨吓書添!(繼續讀書，不理會悲灰姑娘)
悲：唉!書呆，好心你啦!呢個世界都就嚟玩完咯!仲讀乜嘢書吖!
呆：你咪嘈住晒啦!(口中唸唸有詞)
悲：唉!你梗係好討厭我嘞!(魯老師從舞台左側門入，上舞台)喺呢個世界上，又有邊一個人會鍾意我呢？
(眼有淚光)
魯：灰姑娘呀!你咪成日諗埋晒呢D無聊嘢啦!喺呢個世界裡面，有好多人鍾意你!
悲：(情深款款望着魯老師)眞嘅？
呆：早晨，魯老師!
魯：早晨!書呆，點呀？今日有測驗喎!你一定讀晒啦!
呆：今日有測驗咩？邊一科呀？魯老師，點解我唔知嘅？
魯：(假裝)啊!你唔知咩？少有噃!
呆：(緊張地)唔!係唔係突擊測驗呢？魯老師，係唔係你要突擊測驗呀？
魯：(搖頭)我要突擊測驗就唔會話你知啦!
呆：咁……咁係，一定係白老師，佢最鍾意就係突擊啦!魯老師，多謝你嘅通風報信，我會俾心機讀，唔會辜負你對我嘅期望嘅!
(從書包中拿出另一本書來看)
魯：(不忍)唉!書呆，你太緊張啦!其實，我頭先同你講笑咋!
呆：魯老師，我明白嘅!呢D係你哋校方嘅高度秘密，我識做啦!我唔會講出去嘅!我讀書先。
魯：唉!眞係無你修。
悲：老師，你唔好理佢啦!不如理吓我啦!
魯：吓!aIR……(面露尷尬)時間都唔早啦!我哋都係返入學校先啦!
悲：唉!一提起返學，我又頭痛啦!(三人同時轉身，幕啓，舞台燈全亮，舞台分兩區，左區佈置若干椅桌，為班房，右區則是一個空台，三人緩緩步向台左，悲灰姑娘與書呆同時走往後方的書桌坐下)
魯：兩個唔好諗咁多，俾心機上堂啦!一陣見啦!
悲：一陣見!
呆：魯老師我會努力啦!你唔駛擔心。(魯老師沒好氣地從舞台左側出)
悲：魯老師眞係好人啦!成日都關心我，可惜，我哋相逢恨晚吖!
呆：喂!你又嘈乜嘢呀？你唔讀書我要讀!(杜莫奴全身掛上很多飾物，活似一個瘋人般，邊行邊與身上的物件說話，從舞台右側入)
悲：哼!就嚟死啦!仲讀乜喎？
奴：喂!灰姑娘，大家都係好同學，做乜要咒書呆死呀!
呆：莫奴，你嚟得啱嘞!唔該你快D幫我擰走佢啦!佢好大噪音呀!
悲：哼!你有寶咩!莫奴，你有乜發現呀？
奴：發現乜嘢呀？
悲：最近我哋呢度地震又多咗啦!我諗，嗰個預言就快靈驗啦!
奴：唏!好心你咪咁迷信啦!唔會嘅!都叫你哋唔好製造咁多污染啦，咁樣破壞大自然，想唔滅亡都幾難囉!
呆：莫奴講得啱嘞!你少D製造噪音啦!
悲：讀你嘅書啦!(少女一族由紅杏帶領，由舞台左側入)
紅：HI EVERY BODY!
少：我哋少女四人組又嚟啦!
紅：我係人見人愛嘅紅杏!
桃：我係嬌艷動人嘅桃薇!
銀：我係搖曳生姿嘅銀柳!
星：我係點綴繁花嘅小星!
少：今日請各位同學多多……幫襯!(走往書呆及悲灰姑娘那兒兜售物品)
奴：(對着身上的奶咀)唉!又開始啦!都唔明白依家D學生嚟學校係讀書吖，抑或係做買賣嘅!你話吖!咁樣搞法，邊度會有心機讀書喎!你話係唔係？(邊說邊往舞台右側行去，然後坐在地上)
銀：書呆，你咁鍾意讀書，今次我哋有好嘢介紹俾你，包保你用咗之後，成績會突飛猛進!
呆：上次你哋介紹嗰隻強力記憶丸，食到我爭D入醫院呀!你哋都係唔好再搞我嘞!
星：唏!上次係你自己貪心，人哋叫你一次食兩粒，你就成樽食晒，咁你想唔入醫院都幾難啦!
銀：係囉!嗱!今次呢隻唔係藥嚟!
呆：唔係藥，係乜呀？銀、星：係天然食品!(拿出一瓶藥丸)
星：佢係由小麥、雪山野草、加埋蘆州礦泉水，薈州花嘅汁液提煉而成嘅。
銀：絕對無加人造色素!(書呆有些心動，銀柳與小星繼續推銷)
紅：點呀？灰姑娘，你考慮咗好耐囉噃!
桃：其實，又駛乜考慮咁多吖!如果我係你呢，一早就買咗啦!
悲：唉!我眞係唔明白你哋嘞!都死到臨頭啦!仲買咁多化粧品，唔通眞係搵鬼睇咩？
桃：吖!你咁講又幾啱聽喎!做鬼都要做隻靚鬼吖嘛!你冇聽過減馬斯嗰個預言咩？
悲：就係聽過先至擔心。
紅：嗰個預言話呀!當到咗毀滅嘅一刻，會地動天移，島民個個會俾火燒、俾石壓、俾水冲，你話嘞!到時你個樣會點呢？
悲：咁肉酸，唔好講啦!
桃：所以呢!臨死前化定個靚粧，咁死咗都有咁難睇吖嘛!
紅：到時你就係我哋伶仃島最靚嘅屍體啦!
悲：眞嘅？
桃：唔好諗咁多啦!買啦!(萬寶寶與亞擦、水牛從舞台左側入)
擦：(奉承)寶公子，小心呀!嗰度有粒石仔呀!
寶：(不可一世)咁你仲唔執起佢，係唔係要我執呀？
擦：係，係。
寶：乜話？
擦：啊!我嘅意思係，呢D嘢梗係我哋做啦!寶公子，(轉換另一個面口)水牛，企喺度做乜呀？仲唔幫寶公子執咗粒石仔。
水：我？
擦：唔係你，唔通我咩？你唔見我喺度扶緊寶公子咩？
水：啊!(迅速執起石仔，寶公子繼續前行)
寶：(打呵欠)
擦：寶公子，不如食番枝……!
寶：(遲疑)喺呢度，唔怕咩？
擦：怕乜喎!寶公子嘅父親大人，係非常學校嘅校董，邊個敢喺老虎頭上動土噃!
寶：嘻嘻!咁又係，擰嚟嗱!
擦：水牛!
水：係!(從身上拿出一枝棍飽，亞擦已一手搶去，將棍飽折開一小半，然後將大截的棍飽遞給萬寶寶)
擦：寶公子。
寶：唔!(紅杏看到後，立刻走上前)
紅：寶公子，早晨!
寶：
!紅杏，乜今日咁早吖？
紅：時日冇多，冇辦法啦!!寶公子，咁早就食棍飽啦!
擦：紅杏，你唔係想出賣寶公子卦!
紅：我點敢噃!不過，你食呢隻棍飽，好似唔係幾合你嘅身份啫!寶公子喎!梗係要食D名牌貨至得啦!
水：寶公子食嘅係萬寶牌棍飽，仲唔夠名牌呀？打你吖啦!(桃薇、銀柳、小星急忙趕上來)
桃：哎!水牛哥，我哋紅杏姐唔係話你隻牌子唔夠名牌。
銀：不過，比起我哋紅杏姐嗰隻新產品呢!
星：就爭得遠啫!
紅：其實寶公子都算有TaSTE啦!呢隻牌子都幾貴!
桃：不過，點貴得過我哋隻牌子啫!
銀：算啦!我哋隻牌子唔係咁多人食得起嘅!
寶：乜話？你哋幾個靚妹呀!話我寶公子食唔起？你隻棍飽賣幾多錢，即管講，我多多都買得起。
擦：係呀!你當我哋寶公子係乜嘢人呀!世間上有邊一隻棍飽我哋寶公子食唔起呀？
水：寶公子，我幫你打佢哋!
星：哎呀!水牛哥，你唔好一開口就講打先得!話晒我哋都係弱質纖纖嘅……
少：少女四人組!
寶：唏!廢話少講，快D擰你哋隻棍飽出嚟俾我試吓!
紅：(從背囊內取出一枝棍飽)嗱!寶公子，你試吓呢一隻侯爵牌棍飽啦!(亞擦接過棍飽，交給萬寶寶，萬寶寶正想食之際，桃薇阻止他)
桃：咪住!
擦：又做
呀？驚寶公子唔俾錢呀？
水：邊個咁稔寶公子，我打佢!
紅：桃薇唔係話寶公子食霸王飽，我哋點會信唔過寶公子吖!不過，我哋少女四人組做買賣，一向好均眞嘅!銀柳!
銀：係!(從背囊中取出一張貼紙，貼在棍飽上)寶公子，呢個係伶仃島政府規定嘅食品標籤嚟，包括成份同埋有效食用日期。
寶：(不耐煩)得啦!得啦!(想食)
桃：咪住!
擦：喂!你哋又做乜呀!
紅：唔駛咁心急，我哋都係跟法律做啫!小星。
星：係!(從背囊中取出一張紙，與銀柳一起拉開)伶仃島政府忠告市民，食棍飽會引致消化不良!
寶：唉!
紅：寶公子唔好見怪噃!我哋呢D生意仔，好難做!隨時會俾政府CHaRGE!
寶：咁我依家可以食得未吖？
少：可以，請便。(萬寶寶食了一小塊)
紅：點呀？寶公子，冇介紹錯吖嘛？
寶：唔!算你哋啦!(八嬸從舞台左側入，一邊掃地一邊偸看他們的情况)
擦：(奉承)嘻嘻!寶公子，咁呢枝棍飽……。
寶：唔要啦!
擦：咁俾……。(八嬸即搶了過來)
擦：喂!八嬸你……。
八：唔要即係垃圾啦!咁即係我嘅，多謝晒囉喎!寶公子。
寶：唔駛客氣。(施施然返回坐位，亞擦與水牛分立兩旁，少女四人組則繼續游說他們做買賣，八嬸則在他們周圍穿插，舞台左側漸暗，聚燈照往舞台右側的杜莫奴)
奴：(杜莫奴手中拿着一個水晶音樂盒，內有一個跳舞小姑娘，正在旋轉着跳舞)唉!呢個世界點解會變成咁嘅!個個都喺度爭搵錢，搵路走，伶仃島有乜嘢唔好啫？點解要離開喎!
灰：(畫外音)佢哋為咗自己冇乜唔啱吖？
奴：你都讚成佢哋嘅行為？
灰：(畫外音)乜你唔想走咩!
奴：伶仃島係我土生土長嘅地方，我做乜要走喎？
灰：(畫外音)你唔信嗰個預言？
奴：預言？呢D祇不過係無稽之談嚟啫!
灰：但係，呢輪伶仃島嘅地震，眞係多咗好多吖!莫奴……。
奴：你想勸我離開？(大聲地)你係我最鍾意嘅飾物，你竟然咁唔了解我，要我離開……？(燈全亮，舞台左側的人全部看着杜莫奴)
八：嘩!乜嘢事咁大火氣呀？
紅：佢都傻嘅!成日淨係識得對住D死物喺度講嘢!
寶：莫奴眞係無改錯名。
衆：點解呀？
寶：莫，即係不啦!奴，即係腦啦!莫奴，咪即係無腦囉!(除了悲灰姑娘外，衆狂笑)
擦：寶公子，你眞係聰明!
寶：駛乜講!喂!灰姑娘，我講D嘢唔好笑咩？做乜你唔笑呀？
悲：唉!呢個世界都就嚟完咯!我仲點笑得落吖!你哋……。
擦：(截着她)得啦!得啦!你少講D唔吉利嘅說話啦!
水：你再講，我就打你。(一群精靈從舞台後側的黑幕爬出來)
小：嘩!乜今日咁人齊嘅!好彩老師都未番，我哋都唔算遲到。
鬼：喂!你哋做緊乜嘢，咁熱鬧嘅？
閃：有乜嘢好玩呀!“侵”埋我哋玩吖!
亮：好呀!好呀!
銀：你哋班精靈，乜都唔識，好心你哋行開D啦!
柳：係啦!仲學人哋嚟番學添!
星：喂，你哋個精靈爸爸呢？佢賣甩你哋呀？
靈：唔!好臭呀!D人類把口咁臭嘅？
呆：喂!好心你哋唔好嘈住我讀書啦!
水：喂!你咁大聲做乜呀!打你吖啦!(IQ博士從舞台左側入)
I：(勇猛地)精靈仔、精靈仔，邊個蝦我班精靈仔。
靈：IQ爸爸!(精靈一族急忙走至IQ博士旁)
八：IQ博士，係佢哋蝦你班精靈仔呀!俾個炸彈佢哋歎吓啦!(急走至IQ博士身旁)
I：哼!你哋咁夠膽？俾你哋歎吓我新發明嘅共田米16型方子炸彈吖啦!(作投擊勢，衆驚，萬寶寶急推水牛擋架)
水：(裝作鎮定)喂!我自細嚇大嗰喎!你夠膽就揼個炸彈落嚟吖!
I：我眞係揼呀!
水：你揼吖!(三人重複台詞，衆騷動，白老師從舞台左側入)!
白：(大喝一聲)喂!作反呀？(衆縮作一團)見到我嚟就縮成一堆，冇膽匪類!IQ仔，水牛，你哋頭先喺度做乜呀!
I：(驚慌地)我……!我……!呀!白老師，我想去廁所。
白：唔准去!你手入邊D乜嘢嚟？
I：冇吖!
八：有呀!係佢新發明嘅乜嘢共田米炸彈喎!
I：係共田米16型方子炸彈呀!(忙掩嘴)
白：(奸笑)唔!新發明呀？好呀!你識做啦!(攤開手)
I：識!(將炸彈交給白老師，八嬸急忙走往白老師處)
八：白老師，今天我都有D功勞卦？
白：你呀!有D啦!
八：咁値幾多分呀？
白：咁就要睇吓我向上頭攞到幾多分囉!(喇叭聲響，魯老師從舞台左側入)
魯：!白老師，你上呢班咩？
白：(嬌媚狀)唔係，不過，頭先行過，見佢哋嘈生晒，咪入嚟睇吓囉!依家佢地有事啦!魯老師!
魯：咁眞係唔該晒你嘞!咁我依家上堂嘞!
白：魯老師，我有D嘢想同你傾吓呀!
魯：(尷尬地)但係，我依家要上堂喎!不如落堂先傾啦!
白：咁呀!咁你係先至好喎!我等你吓!(嬌嗲)
魯：好呀!你慢慢等啦!
白：咁我出去囉喎!
魯：再見!
白：拜拜!(給魯老師一個深情的飛吻與媚眼，然後從舞台左側出，八嬸則仍在張望魯老師)
魯：八嬸，你喺度做乜呀？
八：(驚嚇)吓!我？我喺度掃地咯!(作掃地狀)
魯：(勞氣)我依家要上堂，你喺度掃地？
八：啊!識做!識做!(急忙從舞台左側出)
魯：上堂啦!你哋仲唔坐好？(衆人坐回原位，亞擦蹲在萬寶寶左側，水牛挺立在萬寶寶右側)好嘞!上一堂我哋講到……(課室內突然出現“DODO”聲，魯老師極其厭煩)又係邊個呀？叫咗你哋幾多次，返學唔可以帶傳呼耳筒啦!邊個犯校規，我即刻扣佢分。
衆：梗係少女四人組啦!係佢哋啦!成日掛住做生意。
紅：喂!你哋唔好冤枉我哋喎!魯老師，我哋做兼職，做得好守規矩，絕對唔會帶傳呼耳筒番學!
衆：搜吓身咪知囉!
銀：魯老師，就算我哋有帶番嚟，我哋都會熄咗佢，唔會有聲出!
桃、星：係呀!係呀!
魯：連震都冇？
紅：我哋知道一震，就會扣分啦!又點會明知故犯喎!
魯：除咗你哋，最有資格有傳呼耳筒嘅就係……!
寶：aIR!魯老師，雖然我萬寶寶係有好多錢，屋企入邊隨時有十部八部傳呼耳筒，但係，我好知學校規矩，我都知道如果扣滿分，就算有多多錢都唔能夠移民嘛!
魯：咁究竟係邊個帶傳呼耳筒番嚟？IQ仔……!
I：唔係我呀!
靈：都唔係我哋呀!
奴：你哋唔好再用呢D電波產品啦!用得越多，就會更加破壞伶仃島嘅環境，地震就會更加多啦!
魯：杜莫奴，你睇唔到我依家已經處理緊呢件事嘅咩？你依家有幾多分呀？你有資格喺度講嘢咩？
奴：(忿怒)分數!分數!我唔知乜嘢叫做分數，我淨係知道你哋一個二個都想離開伶仃島!
魯：莫奴，你再講，我就扣你分!
擦：佢已經係負分啦!魯老師。
魯：咁……咁邊個同佢講嘢，我就扣邊個分。
衆：(嘩然，竊竊私語)
魯：唔准再嘈啦!如果唔係，我又扣分啦!(再出現“DO DO”聲，較前更頻密)點解？點解仲有傳呼耳筒嘅聲音嘅？
衆：(舉起雙手，搖頭，以示淸白)
小：!鬼精靈，你聽吓，D聲好似係喺地下面傳上嚟嗰喎!
鬼：(伏在地面)!係喎!
閃、亮：我哋又要聽，我哋又要聽。(也伏在地面，於是除了杜莫奴和IQ博士之外，衆人都伏在地面上聽)
衆：點解聽唔到嘅？我都聽唔到喎!乜嘢聲都有吖!唓!搵笨嘅!
I：唏!你哋唔駛嘥心機嘞!我發明嘅精靈仔，係有超乎常人嘅耳力!佢哋可以聽到地下五千公尺嘅聲音，我哋又何必嘥心機呢？
水：但係我哋頭先明明聽到“DODO”聲嘅!
I：聲速傳遞係慢過光速嘛!傻佬!一陣間傳到上嚟，未自然聽到囉!
魯：IQ仔講得啱，水牛，你平時唔勤力讀書，搞到小小常識都唔職，扣你分。
水：吓!魯……魯老師，咁都要扣分？
魯：精靈仔，你哋可唔可以分析一下，呢D係乜嘢聲音嚟？
靈：呢D……呢D係……。(精靈仔各人互相推讓，不肯說)
I：唏!你哋班精靈仔，做乜咁唔聽話，魯老師問你哋，你哋就答啦!如果唔係，我又要扣分啦!
魯：如果你哋講得唔啱嘅話，我都唔扣IQ仔分，咁你哋肯講啦!
靈：伶仃島就快陸沉啦!
衆：(驚慌)唔係吖？咁快？我仲未夠錢移民咋？
悲：估唔到咁快我就要香消玉殞咯!唉!
呆：死啦!我都未考到博士，點移民呀？
魯：你哋冷靜D，唔好嘈!精靈仔，呢件事，可大可小，你唔好亂講喎？
小：我聽到地底下面，有一團火湧緊上嚟呀!
鬼：不過，如果我哋少D發出噪音，唔好破壞大自然呢!
閃：咁樣，嗰團火上升嘅速度就會減慢啦!
亮：不過，唔等於會有事喎!衹係俾你哋快D走佬咗喎!
(突然驚報響起，播放一段說話)
畫：各位伶仃島居民請注意，預言終於嚟臨啦!政府依家準備咗最後一艘移民船，喺三個鐘頭之後就會出發，邊個未有足夠分數移民嘅島民，請喺呢三個鐘頭之內儲夠分數，否則後果自負。
(衆人邊聽邊驚，各自心懷鬼胎)
寶：魯老師，你聽到政府點講啦!我依家要即刻番屋企準備移
民，係咁先啦!(萬寶寶急忙從舞台左側出，亞擦與水牛亦緊緊跟隨)
紅：魯老師，咁我都唔上堂啦!我要去賣埋D貨先吖!如果唔係，就趕唔切移民啦!後會有期啦!(紅杏亦從舞台左側出，其餘少女三人組亦隨後出)
Ⅰ：咁……咁魯老師，個個人都走晒囉!你都唔敎書啦!咁我帶四個精靈仔走先啦!精靈仔，快D走啦!IQ爸爸帶你哋去移民呀!
靈：好哋!我哋去坐大船囉!(五人亦從舞台左側出，魯老師看着餘下的人，十分慨歎)
魯：個個都走晒嘞!我睇我都係敎唔到書啦!你哋都走啦!
悲：唉!你又叫我去得邊度呢？不如……不如化定個靚樣等死罷啦。(拿起剛買的化粧品從舞台左側出)
魯：(望着悲灰姑娘)唉!書呆，你……。
呆：你哋唔好嘈我，我要讀書，我依家要立即去考博士考試，通過咗就夠分數移民啦!(收拾所有書本從舞台左側出)
奴：(瘋狂地)哈哈哈!走啦!走啦!你哋呢班市儈、現實、貪心、冇膽嘅人，你哋唔配住喺伶仃島，你哋走啦!即管走啦!哈哈哈!
(邊說邊從舞台右側出)
魯：莫奴!莫奴!(欲追，但走了幾步便停止，想了想，仍是轉回舞台左側出，燈轉暗)
第三場：非常陰謀
時間：未來
地點：非常學校
人物：少女一族(紅杏、桃薇、銀柳、小星)
精靈一族(小精靈、鬼精靈、閃精靈、亮精靈)
掃地八嬸、白老師、亞擦、書呆、悲灰姑娘、萬寶寶、水牛、IQ 博士、灰姑娘、魯老師、杜莫奴
(一段緊張音樂過場，燈轉亮，亞擦與水牛抬着蒙眼的萬寶寶從舞台左側入課室內)
擦：(假裝粗獷的聲音)坐低!(將萬寶寶按在一張椅子上)
水：亞……亞……。(亞擦立刻“殊”水牛，水牛會意地點了點頭，假裝女聲)亞大佬，我哋咁做，究竟使唔使得？
擦：你咁講，係唔係信我唔過吖？
水：唔係，不過，萬一俾人發現，我哋想走都幾難囉!
擦：(奸笑)嘻嘻!咁你大可以放心喎!依家伶仃島嘅人，個個都顧住走佬啦!邊度會有人理我哋喎!
水：但係，我哋擰佢番嚟呢度，會唔會唔安全呀!如果俾校方知道，我哋攞到分數都走唔到佬喎？
寶：係囉!兩位大佬，你哋不外乎係想走佬啫!你哋唔駛咁冒險呀!我大把分數，我送D分數俾你哋吖!你哋放過我啦!
擦：收你嘅聲啦!你估你眞係有大把分數呀？你D分數，係附屬分數嚟咋!你當我哋係傻？哼!要攞分數，都搵你老豆攞啦!
水：大佬，咁我哋依家要點做呀？
擦：廢話梗係搵佢老豆啦!傳呼耳筒呢？(水牛立刻從袋中拿出傳呼耳筒交給亞擦)
水：大佬，傳呼耳筒呀!
擦：唔!(帶起耳筒)依!點解冇人聽嘅？唔通你老豆唔等你，自己上咗船？
水：如果係咁，咁我哋咪白費心機？
擦：哼!時間冇多，再搵唔到佢老豆嘅，我哋就撕票。
寶：呀!撕票？大佬，唔好呀!你哋再打吓先啦!我爹哋得我一個，佢唔會揼低我唔理!你哋再打啦!
擦：!咪嘈!有聲音嘞!(萬寶寶十分緊張地注意情况)喂!叫萬大有聽電話。……你話俾佢聽，如果佢仲想要番個仔嘅話，就即刻嚟聽電話。(等電話之際，仍不忘向水牛示威)……喂!你係萬大有呀？喂!依家你個仔萬寶寶喺我哋手上面，你想要番個仔嘅話，就擰十萬分嚟俾我哋。(仍很威風的樣子，但瞬間面色便轉變了)乜話？你唔制？喂!你唔要你嗰個心肝寶貝呢咩？吓!乜話？喂!喂!哼!豈有此理!
水：大佬，點呀？
擦：(走往萬寶寶處，打了他一拳)去死啦你!
寶：大佬，乜嘢事呀？你做乜打我喎!
擦：枉你做咗咁耐人，都係咁烏“當當”，你老豆話要分唔要仔，仲話你唔係佢親生仔，你係生係死都與佢無關，仲叫我唔好阻住佢執行李添呀!
寶：吓!(雷聲)唔係呀？老豆為咗D分，連親生仔都唔認？
水：大佬，咁講法，即係佢老豆唔肯俾分啦？
擦：廢話!
水：咁我哋依家點做呀？
擦：哼!一不做，二不休，我哋……。
水：撕票？
擦：(奸笑)嘻嘻!算你蠢鈍一世，聰明一時啦!
寶：唔好呀!唔好呀!大佬，我仲未想死住呀!你哋放過我啦!
擦：哼!放過你？放過你咪即係叫我哋去死，話晒殺死你，我哋走佬都走得安全D呀!
水：係囉!依家你老豆唔認你啦!你想移民都唔得啦!咁你留喺度都係死路一條啫!咁遲死早死囉喎!寶少，你就成全我哋啦!等我哋走佬都走得安心D吖嘛!
寶：唔好呀!唔好呀!我……我仲有D分數!我俾晒你哋吖!
擦：你嗰D分數濕濕碎，夠我哋做D乜呀!唔好講咁多嘞!快快趣趣解決咗你，我哋仲有時間去做第二單買賣。(水牛與亞擦齊齊捉着萬寶寶，正準備下手之際，聽到外面傳出少女四人組的聲音，兩人急忙與萬寶寶一起躲藏起來)
桃：紅杏姐，點呀？冇時間啦!
銀：係囉!快D啦!
星：我哋究竟分到幾多啫？(紅杏從舞台左側入，其餘三人跟隨)
紅：哎呀!好心你哋咪喺度嘈啦!你哋唔記得班精靈仔話過咩？唔好發出咁多噪音呀!
桃：(將聲量收細)咁，紅杏姐，你究竟幾時俾番D分數我哋吖？
紅：唉!其實，我遲遲唔俾D分數你哋，都係為你哋好咋!
銀：紅杏姐，你咁講，我哋眞係唔明啦!
紅：唉!你哋有所不知啦!我哋呢D生意仔，有幾多錢賺呀!咁，我為咗我哋幾姊妹將來嘅幸福着想，所以……。
星：所以乜嘢呀？
紅：所以……我擰咗D分數去投資囉!
桃：吓!你……你唔係蝕晒我哋D錢吖？
紅：唔係，梗係唔係啦!你哋紅杏姐會咁失威嘅咩？
銀：咁紅杏姐你快D俾番D分數我哋啦!我仲要番屋企同D家人一齊落船!
星：係囉!如果有咗D分數，我就走唔成啦!
紅：都話叫你哋咪嘈咯!你哋以為投資嘅嘢咁簡單嘅咩？錢攞咗出去，唔係話攞番嚟就即刻攞到番嚟!有手續嘛!嗱!你哋放心啦!我一攞到D錢，兌換咗分數，就即刻分番俾你哋啦!
少：眞嘅？
紅：你哋唔係唔信我吖？
少：唔係!唔係!
紅：咁你哋就番屋企執定行李，一個鐘頭之後再嚟呢度搵我啦!
少：咁好啦!紅杏姐，我哋走啦!紅杏姐，你記得呀!(少女三人從舞台左側出，祇餘紅杏一人)
紅：哼!全部都係蠢豬嚟嘅!一個鐘頭之後，我已經坐喺船上面享受陽光空氣啦!哈哈!(萬寶寶此時乘機爭扎大呼救命)
寶：紅杏，求命啦!救命啦!
水：死仔，仲嗌，打死你。
紅：喂!你哋喺度做乜呀？啊!原來係……。
(水牛急忙掩着紅杏，亞擦亦頻打眼色)
擦：喂!靚妹，大家都係想上同一條船啫!如果你拆穿我哋，你都唔係好好過咗喎!(紅杏頻頻點頭，水牛緩緩地放下手)
紅：我識做啦!我乜嘢都見唔到，乜嘢都聽唔到。
寶：紅杏，乜你咁無義氣？話晒我都幫趁你唔少喎!
紅：寶公子，肉隨砧板上，你都係少講D嘢啦!我都係走先啦!
(欲走，卻被水牛阻住)你……你哋又想點呀？我已經好合作嗰囉喎!
水：我大佬都未話放你走，你唔走得。
紅：咁……!大佬，我幾時走得呀？
擦：幫我哋解決埋呢條廢心先啦!
紅：吓!你要我殺人呀？咁……咁我咪千年道行一朝喪？
擦：唏!呢度淨係得我哋三個，邊度會有人知喎？除非係有人出賣我哋嘅啫!(望望紅杏及水牛)
水：唔會!大佬!我對你好忠心!
紅：(急忙接着)我都係呀!我都係呀!
擦：咁就得啦!我哋一於……。(燈暗，各人維持本來位置，舞台右側燈區轉亮，舞台右側傳出杜莫奴的聲音)
奴：你唔好迫我啦!你唔好再講啦!
畫：莫奴，你冷靜D啦!我咁講，都係為你好啫!
奴：我再講一次，我唔要移民呀!
晝：你留喺呢度，衹有死路一條咋!莫奴，走啦!
奴：小公主，你唔好再講啦!枉我咁愛錫你，你一D都唔了解我嘅？
畫：我唔係唔了解你，衹不過，你係唔可以同個天鬥!莫奴，呢D係天意!天意呀!
奴：唔係!呢D唔係天意，係人!係人自己造成!(燈轉暗，舞台左燈區漸亮，白老師的聲音從舞台左側傳出)
白：魯老師!魯老師!……!
擦：弊!白老師嚟緊!
水：(驚慌地)咁!……咁我哋點算呀？
紅：(驚慌地)今……今次死梗啦!
擦：收聲，有你哋兩個想唔死都幾難啦!扑暈佢暱埋啦!
寶：唔……!唔好呀!唔……(水牛往萬寶寶頭上一扑，萬寶寶已倒地，不省人事，三人合力抬萬寶寶躲在一旁，魯老師匆匆從舞台左側入，白老師緊緊跟隨)
魯：白老師，你唔好煩住我啦!我已經好煩啦!
白：魯老師，乜你好煩咩？係唔係唔夠分數呢？
魯：aIR……!？
白：駛乜煩喎!(有意親近魯老師)
魯：白老師，唔該你唔好郁手郁腳呢!
白：唉!魯老師，呢個時候，你仲扮乜嘢淸高呀？不過咁先至係你，如果你唔係咁正直，都唔會撈嚟撈去，都唔夠分移民啦!我就係鍾意你呢樣嘢!
魯：(有少許忿怒)其實，我祇不過係安份守己啫!有乜唔啱喎？點解我哋呢D咁奉公守法嘅公民，反而有移民嘅資格吖？
白：咁你又唔駛咁嬲，天會幫你!
魯：天？天依家要消滅我她伶仃島啦!
白：但係佢留番一條後路俾你行喎!
魯：後路？
白：唔!望吓我，我就你前面嗰條康莊大道。(挨近魯老師，魯老師面色轉紅，但不再刻意拒絕)
魯：白老師你嘅意思……？
白：咁多年，我淨係鍾意你一個，你唔知嘅咩？
魯：我好多謝白老師咁睇得起我，不過，我……。
白：aIR!你唔駛又講D拒絕我嘅說話嘞!呢個時候，你講嘢最好都係諗淸楚D噃!
魯：好啦!白老師，咁不如你坦白講出嚟，你究竟想點吖？
白：(作裝害羞)好衰你!要人哋講先!人哋女仔嚟嘛!點講得出口啫!
魯：(強忍)咁你唔講就算啦!咁我走啦!我仲要去籌分數。
白：魯老師，唔好走呀!好啦!好啦!講啦!都唔知係唔係前世欠你嘅!有幾多人追我，我都唔睬佢哋，但係……但係人哋就淨係鍾意你一個!其實，唔怕話你知啦!平時我罰學生，收學生D嘢，我報告俾上頭知嘅時候，都寫埋你一份，預咗你一份分數
!
魯：(有點感動)眞嘅？
白：(點頭)衹要你答應我，同我結婚，我嘅分數就係你嘅啦!
魯：吓!結婚？
白：嗱!依家我哋即刻去註冊，跟住就可以上船度蜜月嘞!
魯：即刻？咁急？
白：急乜嘢啫？剩番兩個鐘頭咋!
魯：但係……但係我仲未有心理準備喎!而且婚姻大事好多禮節嘅，我哋就咁草草了事，咁樣我覺得唔係幾好嘅!好對唔住你咁!
白：嘻嘻!我就係知你對我好啦!唉!其實有邊個女人唔想有個浪漫嘅白色婚禮吖!不過，冇辦法啦!以後去到嗰度，先再補辦咯!
魯：咁點得!aIR……不如你依家轉賬D分數俾我先，等我哋去度嗰邊囉，然後結婚，咁咪仲十全十美？
白：咁呀？
魯：你唔係信我唔過吖？
白：咁又唔係，衹不過……。
魯：仲衹不過D乜嘢喎？嗱嗱嗱!你連我呢D少少要求都做唔到，咁第日又點樣做夫妻呀？
白：夫妻？
魯：係囉!做夫妻嘅梗係要互相信任先至得嘛!唉!算啦!我睇我哋都係有緣有份啦!
白：唔好呀!最多咪聽你一次話囉!不過……。
魯：又不過？
白：不過，你要答應我一個要求!
魯：乜你哋D女人咁麻煩!
白：咁人哋係鍾意咁嘛!嗱!我要你錫我一啖，當做訂情禮物。
魯：吓!錫你？
白：梗係啦!然後仲要向天發誓，對我從一而終添!
魯：發誓？唔駛啦卦!
白：(嬲)你唔敢發誓，咁你頭先即係呃我啦？
魯：(安撫)邊度係啫!發誓咪發誓囉!好簡單咋嘛!
白：哼!你咪發誓當食薯片呀!我唔肯過你!
魯：你睇我係D咁嘅人咩？嗱!我發誓啦!我，魯仁直，願意娶白……白乜嘢呀？
白：唏!你有冇搞錯呀!咁耐同事，連我個名都唔記住。
魯：咁我不漏叫開你白老師吖嘛!
白：好衰你!人哋叫做mELODY呀!
魯：啊!我魯仁直願意娶mELODY白小姐為妻，如有反悔，天——誅——地——滅!(白老師按着魯老師的嘴巴)喂!點解你咁遲先至
住我嗰嘴嘅？
白：(不明)你都未講完，我點解要住你嗰嘴呀？
魯：咁通常劇情發展到呢度，梗係話你唔忍心我發毒誓嘛!
白：咁我係有D唔忍心，不過，為咗我哋將來幸福着想，唔忍心都唔得啦!
魯：呀!講開又講嘞!頭先你隻手有D乜嘢呀？搞到我個口依家咁苦嘅!
白：呢D係我家傳嘅戀愛墳墓丹，如果你發完誓之後違背諾言，咁D藥就會喺你肚入面發作，好似有幾十萬條毛毛蟲喺你肚入面轉嚟轉去咁，哈哈哈!好過癮!
魯：(毛骨聳然)你……你竟然咁狠毒？
白：我都係為我自己着想啫!唔好講咁多啦!愛人，COmE ON!我哋去轉賬囉!(遞出玉手，等待魯老師握着，魯老師遲疑了一會，緩慢地伸出手，握着白老師的手，一齊從舞台左側出，亞擦與水牛、紅杏現身)
水：嘩!眞係最毒女人心呀!估唔到白老師貌若天仙，竟然咁狠毒嘅!
紅：乜話？
水：(打量紅杏)你都冇白老師咁靚，我稔你仲會狠毒D呀!
紅：你都痴線!攞我同嗰個白鴿眼比？
擦：你哋唔好嘈啦!紅杏，水牛，我哋快D諗吓點樣解決呢單嘢先啦!
水：不如……必殺技啦!
紅：吓!必殺技？喂!老老實實嘞!我係弱質女流嚟!
我淨係可以幫你哋斬咗佢雙手雙腳，然後“片”埋D肉，揼落攪拌機攪碎，再擰去餵狗咋!
擦：有冇搞錯呀？咁大隻，淨係做得少少咋？咁天光都未搞得掂佢啦!你知最難搞D內臟嘛!(八嬸突然從舞台左側出，衆人嚇了一跳)
八：唔緊要，等我幫吓你哋吖!(燈轉暗，舞台右區燈轉亮，莫奴躺在舞台上)
奴：小公主，你睇，天上面開始有星星啦!唔知點解!今晚D星星特別靚嘅!
灰：嗰晚D星星都係咁靚，莫奴，呢D係不祥預兆嚟!我睇，伶仃島眞係有得救啦!
奴：如果喺一個咁靚嘅夜晚死，都値得吖!係唔係呀奶咀？
灰：佢唔會答你!莫奴，你淸醒D得唔得呀？
奴：我好淸醒，唔淸醒嘅係你!仲有伶仃島嘅島民。
灰：莫奴，喺伶仃島裡面，最好人就係你啦!我眞係唔想你死吖!
奴：哈哈哈!多謝!我唔係好人，我衹係一個瘋子、一個垃圾佬、白痴、傻仔……，哈哈哈!
灰：莫奴，唔好咁啦!(右區燈光轉暗，左燈區轉亮)
擦：吓!八嬸，你幾時入嚟？
八：唏!我一早就暱埋裝你哋啦!你哋唔駛驚喎!我把口就最密啦!我唔會爆你哋單料出去嘅!
水：眞嘅？咁多個幫手都好啊荷大佬？
擦：荷你個頭，死蠢!
紅：八嬸，你有咁好死咩？講點數先啦，你想要幾多分先!
八：哈!不愧係做開生意嘅，講嘢都寧舍唔同嘅。
紅：唔駛擦我鞋嘞!我唔受呢套嘅!
八：好，咁先至夠爽快，嗱!我唔係想要分數，分數我都儲得差不多
嘞!
水：唔係卦!你會夠分移民？你掃地咋噃!
八：唏!咁有時掃掃吓，會有D下欄錢賺嘛!死蠢!
擦：咁你旣然夠分數咯!仲唔快D上船，仲留喺呢度幫我哋？
八：冇法啦!去到嗰邊，都唔知搵唔搵到食嘅，咁咪趁住仲有D時間，搵多少少積蓄咁囉!我唔貪心!我淨係要佢D心、肝、胃、腎、肺同埋眼角膜啫!
紅：嘩!八嬸，你都幾識貨咽喎!
擦：八嬸，呢D筍嘢，你估我哋會俾你賺咩？
八：哼!如果你哋有路出手嘅，我都唔敢咁大膽同你哋講啦!
水：你咁睇小我哋？
八：唔係睇小，係睇死!
水：你……。(想打八嬸，卻被亞擦阻止)
擦：八嬸，做人唔好咁貪心，大家一二三四五好唔好呀？
八：咁呀!咁我要少隻眼角膜啦!不過，我要埋D免治人肉!嗱!人肉唔係咁値錢咋!不過，我諗住喺船上面悶悶哋，可以得閒“趙”吓咋。
紅：你要埋D人肉，咁我……。
擦：收聲!(亞擦目露兇光，紅杏立刻住口)好，我哋一言為定。
八：好囉!好囉!咁快D郁手嘞!唔係遲咗就唔夠新鮮啦!
(此時，魯老師急忙從舞台右側慌忙入，看見他們的情况，衆大驚，不知所措)
魯：喂!你哋做乜呀？萬寶寶？(立刻幫萬寶寶鬆綁)萬寶寶，你冇事吖嘛？
寶：魯老師，你今次立大功啦!佢哋綁架我，頭先仲想撕票添喎!
擦：(轉回奉承的樣子)寶公子，你講乜呀？我哋專登嚟求救你!我哋點會綁架你喎!水牛，你話係唔係咯？
(向水牛擠眉弄眼)
水：係呀!寶公子，邊個綁架你，我打死佢!
紅：寶公子，我係一個弱質女流，更加唔關我事啦!
八：咁我嚟掃哋咋!我乜都唔知!我都係走先啦!
魯：(阻止八嬸)萬寶寶，究竟呢件事係點？
寶：哼!你哋全部都講大話，你唔好以為頭先扑暈我，我就乜都唔知，其實，我一早就醒咗，聽到你哋想將我撕票嘅事啦!(衆大驚)魯老師，拉晒呢班人，我睇，你都夠分數移民啦!
魯：眞嘅？(少女三人組亦於此時從舞台左側入)
桃：哎呀!我都話紅杏姐好準時啦!眞係喺度囉喎!
紅：!乜你哋咁早嚟呀？
銀：唉!都係我衰!我稔住紅杏姐會甩我哋底，所以嗌埋佢哋一齊早D嚟睇吓囉!
星：紅杏姐，你眞係有怪莫怪呀!我哋D分數呢？
少：係囉!我哋D分數呢!
寶：魯老師，拉佢哋啦!
衆：唔關我事!你哋咪成日追住攞分數啦!(衆人互相說話，場面十分混亂，聲音亦隨之而大，忽然一陣隆然巨響，跟着一陣強烈地震，衆人都東拉西倒，亞擦、水牛、紅杏、八嬸乘機從舞台左側出，少女三人組、萬寶寶、魯老師跟隨追趕，舞台回歸平靜，舞台燈轉暗，右燈區轉亮，莫奴坐在地上)
奴：你聽唔聽到呀!
灰：聽到乜呀？
奴：我聽到班房裡面有人聲。
灰：傻啦!依家D人仲點會有時間喺班房度喎!個個都稔住走啦!
奴：小公主，如果我眞係唔走，你會唔會喺度陪我呀？
灰：你係我嘅主人，無論你嘅決定係點，我有得選擇咩？
奴：你咁講，即係就算你留喺我身邊，都唔係自願啦？
灰：莫奴，你唔好誤會我嘅意思，根本一開始我留喺個音樂盒度，就唔係我自願啦!
奴：如果你唔願意嘅，唔會有人勉強到你？你要自己爭取先至得
!
灰：我以前曾經爭取過，但係有用咩？結果就係困喺個音樂盒度，唉!呢D係天意，係冇辦法改變嘅事實，爭取係有用嘅!
奴：點解你哋有D咁嘅思想嘅？我眞係唔明白!我眞係唔明白。
灰：莫奴，你認識童話世界入邊嘅灰姑娘嘛？
奴：灰姑娘？
灰：係!我就係灰姑娘!
奴：吓!(舞台燈全亮，悲灰姑娘從舞台側入，走回自己的坐位上坐着，環視班房四周，有種依依不捨的感覺。此時書呆從舞台左側入)
悲：!書呆，點解你會番嚟嘅？
呆：我番嚟係要搵番本參考書，有咗佢，我實考唔到博士學位啦!
(東找西找)
悲：好心你啦!仲有嗰個零鐘頭，你估你係IQ博士咩!
呆：一日都係你呀!成日嘈住晒，搞到我讀唔到書。
悲：你有冇搞錯呀？自己移唔到民，就喺度發脾氣，賴人哋，你唔好以為我好“蝦”喎!依家我就快死啦!我乜都唔怕啦!(小精靈從舞台後側黑幕入)
靈：好驚呀!好驚呀!
呆：嘩!你班精靈仔，又番嚟做乜呀？咁嘈法，今次想讀到書都幾難囉!
閃：灰姑娘、書呆，你哋救吓我哋啦!
靈：救吓我哋啦!
悲：你哋發生乜嘢事呀？
亮：IQ爸爸佢……佢要捉我哋呀!
靈：係呀!係呀!
呆：IQ仔要捉你哋？佢唔係話帶你哋去移民嘅咩？
悲：係囉!
小：唔係呀!佢要將我哋四個賣俾政府，話……話要將我哋乜嘢卒呀!
呆：乜嘢卒？
鬼：係四個字嚟!乜嘢卒身咁!
呆：以我咁博學多才，但係都未聽過呢句成語噃!
悲：係唔係身先士卒呀？
靈：係呀!係呀!
閃：我哋就係偸聽到佢哋咁講啦!(IQ博士從舞台左側入，小精靈急忙躲在書呆及悲灰姑娘身後)
I：精靈仔，原來你哋暱埋喺呢度，快D跟我走啦!我哋要去坐大船出海啦!
靈：我哋唔去!唔去!
亮：IQ爸爸，你唔好賣我哋啦!我哋會好聽你話!
小：係囉!IQ爸爸，我哋又有做錯事，你做乜要賣我哋喎？
鬼：IQ爸爸，最多以後你叫我哋做乜，我哋就做乜啦!
呆：啊!我明啦!IQ仔，你係唔係想帶佢哋去換分呢？
悲：IQ博士，你睇佢哋幾可憐，你又唔係唔夠分，何必要咁樣對佢哋喎？
I：你哋同我收聲，你估我係你哋，淨係掛住夠分移民就得啦!我要向上爬，爬得越高越好，我有IQ，我可以製造好多嘢，甚至可以製造另一個伶仃島出嚟，我會稀罕呢少少分數？
悲：咁你又要賣精靈仔？
I：我要佢哋幫我哋班島民探路啫!
衆：探路？(莫奴又聽到聲音，循着聲音看去)
I：一直以嚟，伶仃島都係一個孤獨嘅島，冇人知道島外面嘅世界係點嘅，而所有嘅移民亦都一去冇回頭，我哋更加唔知道佢哋去到一個樂土，抑或一個地獄，所以……。
呆：所以你叫班精靈仔先去探路？哼!我唔相信你為咗D島民，願意犧牲你辛辛苦苦發明嘅精靈仔。
悲：我都唔信。
I：冇錯，我唔會咁好人，其實，任何人死咗都唔緊要，最緊要係我唔死，我咁聰明，死咗係全世界嘅損失，精靈仔，你她有個咁聰明嘅爸爸，應該感到光榮!所以就算為我而犧牲，亦都係一件光榮嘅事嚟!如果你哋眞係不幸死咗，唔緊要!我會幫你哋塊島旗，喺呢個島上面，從來冇機械人過島旗!你哋話幾光榮呢？
靈：我哋已經好夠光榮啦!
悲：算啦!IQ博士，你放過佢哋啦!
I：與其要佢哋留喺度送死，不如俾我利用一下，咁咪仲好。
呆：佢哋係你嘅心血結晶，犧牲咗佢哋，你唔會心痛咩？
I：心痛？衹要我嘅腦仍然喺度，我可以製造成千上萬嘅精靈仔，不過，再做精靈嘅時候，我會減少D感情成份，等佢哋可以完完全全聽晒我話，唔會好似依家咁!(面露兇殘的樣子)書呆，無論你點讀，都做唔成博士啦!不如，幫我捉晒D精靈，我可以擔保你移民。
呆：眞……眞
悲：書呆，你唔係吖？你唔好受佢賄賂呀!
I：灰姑娘，你自己有得移民，又想人哋留喺度陪你呀!你都幾自私喎!
悲：我邊度係咁嘅意思呀!你唔好冤枉我喎!
呆：好!我答應你!(小精靈急忙想逃，莫奴亦於此時衝上前)
奴：你哋咁仲算係人嚟嘅咩？IQ仔，書呆，你哋D人性呢？你哋D人性去咗邊呀？連機械人都唔放過？
I：哼!我又唔係殺人放火，機械人係有生命!
奴：但係，你加咗情感因素落去，佢哋就好似我哋人類一樣啦!
I：佢哋係我製造出嚟嘅，我有權控制佢哋嘅生死。(向前欲捉小精靈，但小精靈已先一步從舞台左側逃出，IQ博士和書呆急忙追，悲灰姑娘十分焦急地望着他們)
悲：莫奴，你快D去幫吓精靈仔啦!
奴：唔駛驚喎!灰姑娘，你睇班精靈仔走得幾快，IQ仔雖然係好聰明，但係始終係人，邊度夠班機械人鬥吖!
悲：咁又係!(有點哀愁)
奴：點呀!灰姑娘，做乜又愁眉苦臉呀？
悲：莫奴，一直以來，你同我係最好嘅朋友，你又最肯聽我訴苦!我……我好多謝你呀!(欲哭)
奴：你又嚟囉!我哋係好同學、好朋友……。
悲：仲係有相同命運嘅人!
奴：命運？
悲：我係一個無父無母嘅孤兒，一出世，就註定咗冇移民嘅資格，就註定咗要同伶仃島同生共死。而你……。
奴：你提呢D嘢做乜喎!
悲：對唔住呀!我係唔應該提起你D傷心事嘅!
奴：其實，都唔係乜嘢傷心事吖!IQ低過正常人咋嘛!好平常啫!
悲：但係，就因為咁，你父母留低你一個，走咗去移民，你唔嬲佢她咩？
奴：唔嬲!佢哋算錫我啦!你知嘛!佢留咗我哋嘅全家之寶俾我，等成日都有人可以陪我傾計，我已經好開心啦!
悲：你知唔知吖!D人話你成日同D死物傾計，係……係……。
奴：係傻嘛!我知吖!唔緊要啦!
悲：莫奴，如果我好似你咁就好啦!乜嘢事都話冇所謂。
奴：灰姑娘，其實你應該好好咁睇吓呢個世界，你睇吓D花幾靚，D星星幾咁光，你知嘛!點解D人叫你做灰姑娘呀？
悲：我知，佢哋話我大悲觀，睇樣樣嘢都好灰，所以叫我灰姑娘囉!
奴：嗱!童話入邊嘅灰姑娘，雖然出身低微，但係最後都成為皇后啦!所以，你實在唔應該咁灰!應該積極D做人。(灰姑娘從舞台右側緩緩步出)
灰：莫奴，你錯啦!灰姑娘始終逃唔過命運嘅安排，但始終都係得唔到幸福。
奴：灰姑娘？
悲：莫奴，你叫我吖？
奴：我唔係叫你呀!我係叫緊眞正嘅灰姑娘呀!
悲：眞正嘅灰姑娘？莫奴，你又開始語無倫次啦!(走往別處，不欲理會杜莫奴)
奴：唉!點解我講親乜嘢都冇人相信嘅呢？
灰：你依家仲唔相信命運？其實你嘅思想俾佢哋任何一個人都聰明，但係偏偏通唔過IQ考試，俾人笑你係傻仔，呢個就係最好嘅證明啦!(灰姑娘走至他的身邊，杜莫奴定眼望着他)
奴：灰姑娘？你……你係灰姑娘？
灰：莫奴，我哋終於見面啦!
奴：你!點解嘅？點解咁耐以嚟，你都唔現身見我，但係今日……。
灰：莫奴，你實在係一個大好人，我唔忍心見你就咁樣死喺呢度，我想救你，我幫你離開伶仃島吖!
奴：灰姑娘，我唔會走，亦都唔會死，你唔需要再游說我。不過，我好開心能夠見到你，你眞係好靚!
灰：莫奴!你唔好咁啦!你聽我話啦!你將個音樂盒送去俾政府，話有一個幽靈住係入邊，要求佢哋加你嘅IQ分數，咁樣，你就可以移民啦!
奴：點解你要到依家先至同我見面嘅？我以為你好似個音樂盒入邊個小公主咁，咁細個!原來你都好似我咁高大!
灰：莫奴!
奴：吖!你會唔會肚餓？我請你食嘢吖!(從身上取出一塊餅乾)你可唔可以食嘢？
灰：莫奴呀!你唔好再裝傻扮懵啦!如果你再係咁，我就……我就打爛個音樂盒。
奴：唔好呀!唔好呀!其實，我都係關心你啫!你係我最好嘅朋友，難得係呢個咁嘅時候，我哋可以見面，我好開心呀!
灰：其實，我係唔應該出嚟!我知道我喺伶仃島上面，一現身就會招致殺身之禍，不過，為咗你，我願意犧牲自己。
奴：點解你要對我咁好喎？
灰：點解？因為你對我好囉!一直以嚟，冇一個人對我好!除咗王子，佢好好人!可惜，佢係一個高高在上嘅王子，而我，係一個平凡嘅百姓。
奴：咁有乜嘢所謂啫!祇要佢鍾意你，你鍾意佢就得啦!
灰：世事唔係你想像中咁簡單!莫奴，你祇係一個生活喺自己世界裡面嘅人，你創造嘅世界好純、好靜，可惜衹係一個虛幻世界。點解你唔好好咁面對一下現實吖？
奴：現實？乜嘢係現實呀？現實就係好似佢哋咁，你爭我奪、為求目的，不擇手段!(有點忿怒)
灰：呢D就係人性，係定律，弱肉強食，適者生存，你係人，就要遵守呢一個遊戲規則啦!
奴：如果呢種就係叫人類，我唔願意做，我寧願同你一齊住喺個音樂盒度。
灰：你估我住喺個音樂盒度就好開心咩？我嘅痛苦又有邊一個會知喎？(哭)
奴：灰姑娘，好對唔住呀!
灰：(搖頭)呢D係唔關你事嘅!
奴：其實，你依家能夠現身，咁你咪即係可以離開個音樂盒囉？
灰：我雖然可以現身，但係我唔能夠離開個音樂盒十步以外嘅地方
!盒在靈在，盒亡靈亡，如果音樂盒一爛，我就唔可以再投胎
啦!
奴：咁你要喺音樂盒住幾耐先至可以投胎呀？
灰：一千年!
奴：咁依家……。
灰：九百九十九年零十個月。
奴：咁……咁即係仲有兩個月，你就可以再投胎做人？
灰：可惜，天意!
奴：灰姑娘，對唔住呀!我幫唔到你，仲……仲害埋你添!(突然地殼劇烈震動，悲灰姑娘驚慌地走回杜莫奴處)
悲：莫奴，又地震啦!又地震啦!
奴：灰姑娘，你唔好咁驚啦!呢度成日地震啦!
悲：但係，今次唔同!今次一定死梗啦!死梗啦!
奴：灰姑娘，攞起D勇氣嚟啦!我會保護你!
悲：莫奴，你眞係好嘞!喺呢個時候，你仲安慰我，其實有你陪我一齊死，我已經好開心啦!
奴：傻啦!除非你自己要死嘅啫!如果唔係，我哋係唔會咁易死
!
悲：莫奴，有時你講嘢，眞係唔似一個IQ低嘅人!衹可惜……。
奴：我永遠都通唔過嗰個IQ考試吖嘛!我嘅IQ永遠都衹係得十歲，但係咁咪仲好，人越成長，煩惱就越多，如果永遠都好似D細佬仔咁，你話幾幸福呢!
悲：唉!我稔我點學，都學唔到你呢種思想啦!
奴：十歲莫奴嘅思想？學嚟做乜喎？(杜莫奴的怪模樣，令悲灰姑娘破涕而笑)灰姑娘，其實，你笑起嚟好靚呀!你應該笑多D
!
悲：你又喺度安慰我嘞!莫奴，你今日做咗好多善事吖!
奴：你以為我講大話？十歲嘅莫奴，仲未識講大話!
悲：(又笑)莫奴，我眞係有你修啦!其實，如果你唔係成日同D死物講嘢，多D同我哋傾計，我稔佢哋一定唔會再話你係傻仔啫!
奴：要我同佢哋講嘢？不如我同我D心愛嘅物品傾計仲好啦!
悲：(摸杜莫奴身上的飾物)佢哋都唔會講嘢，你哋點溝通呀？
奴：用心囉!雖然佢哋唔會講嘢，但係我哋可以用心嚟溝通!仲有呢個音樂盒，裡面又係住咗一個灰姑娘!(打開音樂盒)
悲：呢個灰姑娘好靚呀!
奴：(開心地)佢眞係識得講嘢!我頭先仲同佢見面添喎!(略停)我知，我知你一定唔相信啦!
悲：我信。
奴：你信？
悲：唔!依家衹係剩得我哋兩個，我唔信你，仲可以信邊個喎？而且，或者你眞係有能力同佢哋溝通呢!
奴：灰姑娘，好多謝你呀!你係第一個信我嘅人。(地震又起)
悲：(驚慌)又地震啦!
奴：震震吓就慣啦!
悲：莫奴，我覺得，我一步步咁走向死亡，好恐佈呀!(大叫一聲)
奴：灰姑娘，你冷靜D啦!有事!攞D勇氣出嚟啦!衹要我哋有決心，乜嘢事都可以迎刃而解啦!
悲：(又震)唔得啦!睇嚟，我哋眞係死路一條啦!
奴：(大叫)灰姑娘!
悲：莫奴，我唔想!但……但係，我……我控制唔到我自己呀!我眞係唔想死呀!莫奴，有冇辦法唔駛死，我願意付出任何代價，眞!任何代價!
灰：莫奴，攞我俾政府，不單衹你唔駛死，仲可以救埋灰姑娘添呀!
奴：唔得，我唔可以犧牲你!
悲：莫奴，我好驚呀!我哋要永別啦!
灰：莫奴，唔通你為咗自己嘅原則，見住灰姑娘咁辛苦，你都唔救佢？
奴：我……我……，如果我可以放棄我嘅原則嘅，我就唔係杜莫奴啦!你要我學嗰D人咁，為咗自己，不惜犧牲人哋，做盡壞事？呢種埋沒良心嘅事，我絕對唔會做，我係一個眞眞正正嘅人，唔係嗰D禽獸都不如嘅自私鬼，我唔信預言，我唔信天意，我衹係信我自己!(雷聲)
悲：莫奴，無得救啦!無得救啦!
灰：你見死不救，你先至係自私呀!枉我仲對你咁忠心，枉灰姑娘當你係最好嘅朋友!你一D同情心都有嘅咩？
奴：我唔係!我唔係呀!
灰：唔係你就將我擰去俾政府!莫奴，有時間啦!嚟啦!攞住個音樂盒，去啦!去啦!
奴：(拿過音樂盒，走往悲灰姑娘處)灰姑娘，你信唔信我呀？
悲：(點頭)
奴：除咗信我之外，你仲要信你自己，你記唔記得我講嘅說話呀？
悲：你話，如果我唔想死，我係唔會咁易死喞。
奴：無錯，我哋要攞住呢個信念，克服前面喞困難，我哋一齊對抗命運，好唔好呀？
悲：對抗命運？我……同你？
奴：(點頭)唔!
悲：得咩？
奴：俾D信心自己。
悲：咁……咁……莫奴，你會幫我？
奴：我一定會幫你。
悲：多謝你，有你喺我身邊，我乜都唔駛怕啦!(望天、望地)你哋即管行雷啦!地震啦!我唔會再驚啦!莫奴!我覺得自己依家充滿力量呀!(微笑)
奴：係囉!咁先至係嘛!
灰：唉!究竟你係啱，定係錯呢？
奴：灰姑娘，信自己啦!你亦都應該跳出你自己嘅心網，重新過一個新生活啦!
灰：可惜我無時間啦!
奴：連灰姑娘都可以攞勇氣出嚟咯!唔通你呢個正牌灰姑娘就唔可以咩？唔好忘記，當日你俾後母迫害，但終於你都能夠排除萬難，穿上嗰對玻璃鞋，同王子結婚，唔通今日你就甘心放棄可以重獲新生嘅機會咩？
灰：我唔放棄，我唔想放棄，當日自殺，我已經做錯咗一次!我足足後悔咗差唔多一千年!我實在唔想再錯落去。
奴：咁你就要同我哋一齊，我會好好咁保護個音樂盒!就算死，我都要好好保存好，等你有重生嘅一日。
灰：莫奴!
奴：你信唔信吖？(後台群情洶湧，紅杏首先衝入舞台，少女三人組跟隨)
紅：你哋唔好咁啦!我都話D分數蝕晒咯!
桃：頭先你明明話會俾番D分我哋!
銀：係囉!你咁樣即係明呃啫!
小：紅杏姐，你就算唔俾多，都俾番個本我哋吖!
銀：係囉!如果唔係，我哋反!
紅：啊？反面？點反呀？我依家係唔俾啦!點吖？
小：你唔俾，我哋就打到你俾!
銀、桃：好!打你。(四人正在混戰之際，亞擦與水牛、八嬸趕至)
紅：亞擦，救命呀!(萬寶寶與魯老師亦趕至)
寶：哼!紅杏，佢自己都自身難保呀!點救你呀!
魯：萬寶寶，時間有多，快D搞掂佢，我哋就可以上船啦!(白老師從後趕至)
白：愛人!你咁心急做乜呀？點解唔等埋我呀？
魯：吓!你……!
白：想走？你唔好忘記你食嗰粒戀愛墳墓丹噃!
魯：我邊度係呢？不過，我想幫萬寶寶拘捕班綁匪咋嘛!我攞多D分數，你都有益啫!
白：你冇講大話？
魯：我呢一生人(辛苦地)……從來……從來未講過大話!
白：做乜講嘢講得咁辛苦呀？哼!負心人，你D藥力發作啦!(小精靈與IQ博士、書呆入)
靈：唔該借借，唔該借借。
I：精靈仔，你哋D能量就用完啦!你哋走唔甩啦!
呆：IQ博士，快D捉住佢哋啦!(衆人在人群中互相穿插，發出尖叫聲，莫奴見狀，急忙與悲灰姑娘阻止他們，突然，一陣強烈雷聲，地殼又在劇烈震動)
亮：你哋唔好再嘈啦!你哋唔記得我哋話過乜嘢咩？
小：係呀!如果再製造咁大嘅噪音，我哋就會滅亡啦!
奴：你哋靜一靜啦!靜一靜啦!(衆人將所有動作定住，四周環境回復平靜，地震亦停止了)
閃：(細聲)嗱!你哋保持住依家嘅動作，聲量，地震就會停啦!
(有人動)
鬼：唏!都話叫你唔好郁咯!
I：唔好郁？唔好郁點樣捉住你哋呀？
呆：IQ博士，佢哋會唔會講大話呃我哋呀？
靈：我哋有講大話!
寶：繼續係咁，就算我報到仇，都趕唔切落船啦!
衆：係喎!係喎!(聲音漸大，地震又起)
奴：你哋安靜D啦!如果唔再地震嘅，你哋咪可以唔駛移民囉!
紅：靜D？咁要靜到幾時呀？
八：唔通一粒聲都唔出，郁都唔郁咩？咁樣一樣係等死咋!
水：如果係咁，我寧願搏一搏咯!
擦：哼!你最啱聽到係呢句啦!(衆人又再大聲說話，走動，準備離
開，莫奴勸喩無效，此時雷聲更大，地震更劇)
靈：冇啦!有得救啦!(兩塊紅長布從舞台兩側出，不斷震動，向舞台上各人纏繞，衆人紛紛走避，有些更成滾地葫蘆)
寶：死啦!我要上船呀!我唔想死呀!救我呀!
魯：你唔好纏住我啦!我唔想臨死仲見到你呀!
靈：IQ爸爸!IQ爸爸!捉實我哋啦!你會冇事!
呆：我D書有啦!
小：呀!救命啦!救命啦!
悲：莫奴，莫奴，你係邊度呀？我支持唔住啦!
莫：灰姑娘，灰姑娘，你要支持住呀!記住我句說話，靠自己呀!
悲：莫奴!莫奴!(悲灰姑娘想抓着莫奴的手，但莫奴一手拿着音樂盒，不夠氣力)
灰：莫奴，放低我啦!放低我就可以救到灰姑娘啦!
奴：唔得，我應承過你，一定要保護你嘅!
灰：但係……。
奴：你唔駛講嘞!兩個灰姑娘我都要救!(一陣雷聲，紅布轉動更加快，將群衆團團圍住，衆人幾經爭扎，仍擺脫不了，雙雙倒下，燈暗)
第四場：非常結局
時間：酷劫後
地點：伶仃島
人物：杜莫奴、悲灰姑娘、灰姑娘(其餘人物全部作屍體)
(燈緩緩亮起，但仍不太強，杜莫奴從人群中掙扎爬出來，手中仍拿着音樂盒)
奴：好彩個音樂盒冇事啫!灰姑娘，你放心啦!你平安啦!仲有一個灰姑娘喎!灰姑娘!(杜莫奴在人群中找尋)魯老師？白老師？書呆？紅杏、桃薇、銀柳、小星？灰姑娘呢？灰姑娘，你喺邊度呀？哎呀!(踢到一些物品)!萬寶寶？亞擦、仲有水牛，估唔到你哋死都要攬埋一齊，IQ博士？哼!枉你聰明一世又點呀？依家咪一樣要一死(檢查那些精靈仔)唔郁嘅？梗係冇晒能量嘞!你哋放心啦!我一定會幫你哋補給能量!八嬸？唉!連你都死埋呀!咁!咁仲有灰姑娘，佢究竟喺邊度呢？(再努力找尋些生還者)唉!估唔到你哋左計右算，想要離開伶仃島，但係始終要死喺呢度。如果你哋早D覺悟嘅，我稔或者你哋仲會有得救，可惜一切都太遲啦!唔通伶仃島日後，就剩番我一個人孤苦伶仃。(坐在舞台中央，打開音樂盒)灰姑娘，我始終救唔到另一個灰姑娘呀!灰姑娘，你應吓我啦!你應吓我啦!(音樂聲突然停頓)唔會嘅!唔會嘅!唔會連你都死埋嘅!灰姑娘!灰姑娘!(縮作一團哭)唔通，我哋眞係逃唔過命運嘅安排咩？天呀!你係唔係眞係咁絕情呀？(忽然一陣細微的聲音傳入杜莫奴的耳中)
悲：莫奴!莫……莫奴。
奴：灰姑娘？(大聲)灰姑娘，你喺邊度呀？
悲：我……我喺呢度呀!(杜莫奴在舞台下發現悲灰姑娘，杜莫奴急忙拉悲灰姑娘返回舞台)
奴：灰姑娘，你冇事吖嘛？
悲：冇，我冇事，莫奴，見番你眞係好嘞!我……我仲以為呢一世都見唔到你啦!(哭)
奴：你唔好咁啦!依家我哋見番面，要開心先至係嘛!
悲：!其他人呢？
奴：佢哋全部都死晒啦!
悲：死晒？咁……咁我哋咪好好彩？
奴：可能呢D眞係天意啦!要離開嘅就死晒，要留低嘅就有事。
悲：莫奴，點解你依家講嘢嘅口氣，咁似大人嘅？你……你已經唔係十歲嘅莫奴啦!
奴：係咩？點解我自己唔覺嘅？
悲：所以以前D人話，塞翁失馬，焉知非福，眞係有錯!
奴：灰姑娘，你竟然學書呆掉書包吖？似乎，你都聰明咗喎!
悲：係咩？我淨係覺得我依家好開心，我好想笑咋!莫奴，你講得好啱呀!我哋一定要靠自己!你以後都唔好叫我灰姑娘啦!
奴：唔叫灰姑娘，叫乜呀？
悲：我要重新做人，唔!你叫我小新吖!
奴：好呀!小新，以後我哋就一齊努力，重整伶仃島。
悲：唔!(杜莫奴忽然想起灰姑娘，心中難過)
奴：唉!
悲：莫奴，點解你又唉聲嘆氣呀？
奴：最可惜嘅，就係眞正嘅灰姑娘，我始終保護唔到佢。
(將音樂盒遞給悲灰姑娘看)
悲：哎呀!音樂盒爛咗呀!
奴：佢仲有兩個月就可以回復自由啦!依家……。
灰：莫奴，你何必咁傷心呢？(灰姑娘從舞台後側出現)
奴：灰姑娘？
悲：灰姑娘？喺邊度呀？
奴：後面呀!
悲：嘩!佢眞係灰姑娘？佢好靚呀!
奴：灰姑娘，原來你都未死，咁眞係太好啦!(欲行近她)
灰：莫奴，唔好呀!我就快要投胎，我唔可以再沾染人氣啦!
奴：你可以投胎呢咩？點解呀？
灰：點解？因為我已經想通咗，唔再受到命運嘅支配囉!莫奴，我好多謝你，我依家要去搵我心愛嘅王子啦!
悲：(坦率地)你死咗咁耐，王子仲生存咩？佢好可能都會投咗胎喎!
灰：(驚呀)王子佢會投胎？
奴：係喎!如果王子投咗胎，咁你去邊度搵佢呀？你又點認得佢嗰樣喎？
灰：呢層……我都未稔過。(有點徬惶)
悲：仲有呀!如果王子投胎變咗隻豬，或者變咗女人，咁你……。
奴：小新，好心你唔好咁樣嚇灰姑娘啦!
悲：咁係吖嘛!
奴：灰姑娘，你不如留喺度，同我哋……。
灰：好多謝你哋咁關心我，我稔，我都係……(嫣然一笑)信自己!
(音樂出，舞台燈轉暗，幕下)
——全劇完——
初稿完成於1995年7月22日晚上10時50分
時屆仲夏時分，氣溫高達攝氏34度
